മമ്മൂട്ടിയുടെ ഏറ്റവും പുതിയ സിനിമയായ ‘കണ്ണൂർ സ്ക്വാഡി’നെ പ്രശംസിച്ച് ദുൽഖർ സൽമാൻ. സോഷ്യൽ മീഡിയയിലൂടെ ആയിരുന്നു ദുൽഖറിന്റെ പ്രതികരണം. ‘എനിക്ക് കണ്ണൂർ സ്ക്വാഡ് ഇഷ്ടമായി. ഞാൻ കേൾക്കുന്നതും വായിക്കുന്നതും എല്ലാം നിങ്ങളും ചെയ്യുന്നതുപോലെ തോന്നുന്നു, വാപ്പച്ചി’ എന്നാണ് ദുൽഖർ കുറിച്ചത്. പിന്നാലെ കമന്റുകളുമായി ആരാധകരും രംഗത്തെത്തിയിട്ടുണ്ട്.
പുതുമുഖ സംവിധായകർക്ക് എന്നും അവസരം നൽകുന്ന നടനാണ് മമ്മൂട്ടി. അടുത്തകാലത്ത് അദ്ദേഹത്തിന്റേതായി പുറത്തിറങ്ങിയ സിനിമകളിൽ ഭൂരിഭാഗവും അത്തരം ചിത്രങ്ങളാണ്. അത്തരത്തിലൊരു പുതുമുഖ സംവിധായകന്റെ ചിത്രമാണ് ‘കണ്ണൂർ സ്ക്വാഡ്’. റോബി വർഗീസ് രാജ് സംവിധാനം ചെയ്ത ഈ ചിത്രം ഇന്നലെയാണ് തിയറ്ററുകളിൽ എത്തിയത്. മികച്ച അഭിപ്രായങ്ങളാണ് ചിത്രത്തിന് ലഭിച്ചുകൊണ്ടിരിക്കുന്നത്. യഥാർത്ഥ കഥയെ ആസ്പദമാക്കി ഒരുക്കിയ ചിത്രം മമ്മൂട്ടിയുടെ കരിയറിലെ മറ്റൊരു പൊൻതൂവൽ എന്നാണ് ആരാധകർ അഭിപ്രായപ്പെടുന്നത്. നടി മാല പാര്‍വതി, സംവിധായകന്‍ ബിലഹരി, തിരക്കഥാകൃത്ത് മനോജ് രാംസിംഗ് തുടങ്ങിയ നിരവധി പേരും ചിത്രത്തെ പ്രശംസിച്ച് രംഗത്തെത്തിയിട്ടുണ്ട്.
‘അടുത്ത സൂപ്പര്‍ഹിറ്റ്. കണ്ണൂര്‍ സ്ക്വാഡ്’ എന്നാണ് മാല പാര്‍വതിയുടെ പോസ്റ്റ്. “കണ്ണൂര്‍ സ്ക്വാഡ്. സൂപ്പര്‍ഹിറ്റ് ലോഡിംഗ്. തിയറ്ററില്‍ കൈയടിക്കാന്‍ അവസരങ്ങള്‍ ഒരുപാടുണ്ട്’ എന്നാണ് സംവിധായകന്‍ ബിലഹരി കുറിച്ചു. തിരക്കഥാകൃത്ത് മനോജ് രാംസിംഗ് വിശദമായ കുറിപ്പാണ് ചിത്രത്തെക്കുറിച്ച് എഴുതിയിരിക്കുന്നത്. കൂടാതെ മമ്മൂട്ടിയുടെ പ്രകടനത്തെയും അദ്ദേഹം പ്രശംസിക്കുന്നുണ്ട്.
