ഈ വർഷം തിയേറ്ററുകളിലെത്തിയ സിനിമകളിൽ തരംഗം സൃഷ്ടിച്ച് റെക്കോർഡ് നേടിയ ചിത്രമാണ് ഫഹദ് ഫാസിൽ നായകനായെത്തിയ ‘ആവേശം’. ജിത്തു മാധവൻ സംവിധാനം ചെയ്ത ചിത്രം നൂറുകോടിയിലേറെയായിരുന്നു ആഗോള കളക്ഷൻ നേടിയത്. ഇപ്പോഴിതാ ചിത്രത്തെ പ്രശംസിച്ച് രംഗത്തെത്തിയിരിക്കുകയാണ് ബോളിവുഡ് താരം വരുൺ ധവാൻ.
ഇൻസ്റ്റാഗ്രാം സ്റ്റോറിയായാണ് വരുൺ ധവാൻ ആവേശം സിനിമയേയും ഫഹദ് ഫാസിലിനേയും അഭിനന്ദിച്ചുകൊണ്ട് രംഗത്ത് വന്നത്. ആവേശത്തിലെ ഒരു ഗാനരംഗത്തിന്റെ സ്ക്രീൻഷോട്ടാണ് താരം പോസ്റ്റ് ചെയ്തത്. ‘രംഗണ്ണൻ എപ്പോഴും തന്റെ വാക്കുപാലിക്കും എന്ന് വരുൺ ധവാൻ കുറിയ്ക്കുകയും ചെയ്തിട്ടുണ്ട്. ഈ സിനിമ എല്ലാ സിനിമാ പ്രേമികളും തീർച്ചയായും ഇഷ്ടപ്പെടുമെന്നും വരുൺ കൂട്ടിച്ചേർത്തു.
ഇതാദ്യമായല്ല ചലച്ചിത്രരംഗത്തുനിന്നുള്ള പ്രമുഖർ ആവേശത്തെ പ്രശംസിക്കുന്നത്. നേരത്തേ നയൻ താര, സാമന്ത എന്നിവർ ആവേശത്തെ വാനോളം പുകഴ്ത്തിക്കൊണ്ട് എത്തിയിരുന്നു. ഈ വർഷത്തെ വിഷു റിലീസായാണ് ആവേശം തിയേറ്ററുകളിലെത്തിയത്. അൻവർ റഷീദ് എന്റർടൈൻമെന്റ്‌സിന്റെ ബാനറിൽ അൻവർ റഷീദും ഫഹദ് ഫാസിൽ ആൻഡ് ഫ്രണ്ട്‌സിന്റെ ബാനറിൽ നസ്രിയ നസീമും ചേർന്നാണ് ചിത്രം നിർമിച്ചത്.
