സൗദി പൗരൻമാർക്ക് ഇഷ്ടമുള്ള വിദേശികളെ രാജ്യത്തേക്ക് അതിഥികളായി കൊണ്ടുവരാൻ അനുവാദം നൽകുന്ന വ്യക്തിഗത വീസയിൽ ഉംറ ചെയ്യാനും അനുവാദമുണ്ടെന്നു സൗദി ഹജ് ഉംറ മന്ത്രാലയത്തിൻ്റെ അറിയിപ്പ്. സൗദി പൗരൻമാർക്കു സിംഗിൾ വീസയ്ക്ക് 90 ദിവസവും മൾട്ടിപ്പിൾ വീസയ്ക്ക് ഒരു വർഷവുമാണു കാലാവധിയുള്ളത്. ഒരേസമയം ഒന്നിലേറെ വ്യക്തിഗത വീസകൾക്കായി സ്വദേശികൾക്ക് അപേക്ഷിക്കുകയും ചെയ്യാം.
വീസാ കാലാവധിക്കുള്ളിൽ അതിഥികൾക്ക് ഒന്നിൽ കൂടുതൽ തവണ രാജ്യത്തു വന്നു പോകാൻ അനുവാദമുണ്ടാകും. മൾട്ടിപ്പിള് വീസയിലുളളവർ രാജ്യത്ത് പ്രവേശിച്ചാൽ 90 ദിവസത്തിന് ശേഷം രാജ്യത്തിനു പുറത്തു പോയശേഷം തിരിച്ചുവരേണ്ടതാണ്. വ്യക്തിഗത വീസയിലെത്തുന്നവർക്ക് മദീനയിൽ പ്രവാചകൻ്റെ പള്ളിയിൽ ആരാധനയും സന്ദർശനവും നടത്താനും ചരിത്ര സ്ഥലങ്ങളും വിനോദ സഞ്ചാര കേന്ദ്രങ്ങളുമുൾപ്പെടെ രാജ്യത്തെവിടെയും സഞ്ചരിക്കാനും അനുവാദമുണ്ടാകും.