ദുബായ് വിമാനത്താവളത്തിൽ 25 കാരനായ യൂറോപ്യൻ പൗരന്റെ ബാഗിൽ നിന്നും മയക്കുമരുന്നും കഞ്ചാവും പിടിച്ചെടുത്തു. പരിശോധനയിൽ കഞ്ചാവിൻ്റെ വ്യതിരിക്ത രൂപത്തിലുള്ള പച്ച സസ്യത്തിന്റെ പത്ത് ഗുളികകൾ അടങ്ങുന്ന ഒരു മരുന്ന് പെട്ടി ഇയാളിൽ നിന്ന് ഉദ്യോഗസ്ഥർ കണ്ടെടുത്തു. ജനറൽ ഡിപ്പാർട്ട്മെന്റ് ഓഫ് ഫോറൻസിക് സയൻസ് ആൻഡ് ക്രിമിനോളജി ഈ പദാർത്ഥം നിയമവിരുദ്ധ മരുന്നാണെന്ന് സ്ഥിരീകരിക്കുകയും ചെയ്തിട്ടുണ്ട്. എന്നാൽ താൻ നാട്ടിൽ ഉപയോഗിച്ചതിന്റെ ബാക്കി ബാഗിൽ വെച്ച് മറന്നു പോയതാണ് എന്നാണ് ഇയാൾ അധികൃതരോട് പറഞ്ഞത്.
അതേസമയം യുവാവിന്റെ ട്രാവൽ ബാഗിൽ നിന്ന് കഞ്ചാവും കഞ്ചാവ് ചെടികൾ മുറിക്കുന്നതിന് വേണ്ടി രൂപകൽപ്പന ചെയ്ത ഒരു ഉപകരണവും അധികൃതർ കണ്ടെടുത്തിട്ടുണ്ട്. എന്നാൽ താൻ മനഃപൂർവം ചെയ്തതല്ലെന്നും ഈ വസ്തു ബാഗിൽ അറിയാതെ വെച്ചതാണെന്നും രാജ്യത്തേക്ക് ഇറക്കുമതി ചെയ്യാൻ ഉദ്ദേശിച്ചതല്ലെന്നും പ്രതി കുറ്റം സമ്മതിച്ചു.
പിന്നീട് അധികൃതർ നടത്തിയ പരിശോധനയിൽ ഇയാൾ മയക്കുമരുന്നിൻ്റെ സ്വാധീനത്തിലാണെന്ന് കണ്ടെത്തി. തുടർന്ന് യുവാവിനെ ദുബായ് കോടതി ശിക്ഷിക്കുകയും 10,000 ദിർഹം പിഴ ചുമത്തുകയും ചെയ്തു.