യുഎഇയുടെ ചില ഭാഗങ്ങളിൽ ശക്തമായ മഴയും ഇടിമിന്നലും തുടരും. ഈ സാഹചര്യത്തിൽ നാളെ ഫ്ലെക്സിബിൾ വർക്ക് സംവിധാനം നടപ്പിലാക്കാൻ സ്വകാര്യ കമ്പനികളോട് മാനവ വിഭവശേഷി, എമിറേറ്റൈസേഷൻ മന്ത്രാലയം (മൊഹെ ) വ്യാഴാഴ്ച ആഹ്വാനം ചെയ്തു.
അത്യാവശ്യ ഘട്ടങ്ങളിൽ ഔട്ട്ഡോർ ജോലികൾ ഉറപ്പാക്കാൻ കമ്പനികൾ ആവശ്യമായ നടപടികൾ കൈക്കൊള്ളണമെന്നും മന്ത്രാലയം പറഞ്ഞു. കൂടാതെ പുറമേ ജോലി സ്ഥലങ്ങളിലേക്കും പുറത്തേക്കും യാത്ര ചെയ്യുന്ന തൊഴിലാളികളുടെ ആരോഗ്യവും സുരക്ഷയും കമ്പനികൾ ഉറപ്പാക്കേണ്ടതും നിർബന്ധമാണ്.
അതേസമയം റാസൽഖൈമയിൽ കനത്ത മഴ നാശം വിതച്ചതിനാൽ നാളെ സർക്കാർ സ്കൂളുകളിൽ ക്ലാസുകൾ റിമോട്ട് ലേർണിംഗ് ആയി നടത്തുമെന്ന് നേരത്തെ തന്നെ പ്രഖ്യാപിച്ചിരുന്നു. എമിറേറ്റിൽ ക്രൈസിസ് മാനേജ്മെന്റ് ടീമുകളും അതീവ ജാഗ്രത പുലർത്തുന്നുണ്ട്. അടുത്ത രണ്ട് ദിവസങ്ങളിൽ രാജ്യത്തിന്റെ കിഴക്ക്, വടക്ക് തീരപ്രദേശങ്ങളിൽ മിന്നലും ഇടിയും വ്യത്യസ്ത തീവ്രതയുള്ള മഴയും പ്രതീക്ഷിക്കുന്നതായും മൊഹെ കൂട്ടിച്ചേർത്തു.