ഫെയ്സ്ബുക്ക് പേജിന്റെ കവര് ചിത്രം പുതുക്കി ചാണ്ടി ഉമ്മന് എംഎൽഎ. ശബരിമല ശ്രീകോവിലിലെ ‘തത്ത്വമസി’യുടെ ചിത്രമാണ് ചാണ്ടി ഉമ്മന് പങ്കുവച്ചിരിക്കുന്നത്. പുതുപ്പള്ളിയിൽ റെക്കോർഡ് വിജയം നേടിയ ചാണ്ടി ഉമ്മൻ എംഎൽഎയായി തിങ്കളാഴ്ച ആയിരുന്നു സത്യപ്രതിജ്ഞ ചെയ്തത്.
37,719 വോട്ടുകളുടെ മണ്ഡലത്തിലെ ഏറ്റവും വലിയ ഭൂരിപക്ഷവുമായാണ് ചാണ്ടി ഉമ്മന് നിയമസഭയിൽ എത്തിയത്. പുതുപ്പള്ളിയെ ഉമ്മൻ ചാണ്ടിയുടെ റെക്കോർഡ് ഭൂരിപക്ഷവും മറികടന്നായിരുന്നു ചാണ്ടി ഉമ്മന്റെ ചരിത്ര ജയം. നിയമസഭയിൽ ചോദ്യോത്തര വേളയ്ക്ക് ശേഷമായിരുന്നു ദൈവനാമത്തിൽ സത്യപ്രതിജ്ഞ ചെയ്തത്. ഇതിന് ശേഷം സ്പീക്കറെയും മുഖ്യമന്ത്രിയേയും പ്രതിപക്ഷ നേതാവിനെയും സഭാംഗങ്ങളെയും ചാണ്ടി ഉമ്മൻ അഭിവാദ്യം ചെയ്തു സംസാരിച്ചു.
തൃക്കാക്കര എം.എല്.എ ആയ ഉമ തോമസിന്റെ അരികിലാണ് ചാണ്ടി ഉമ്മന്റെ ഇരിപ്പിടം. ഉമ്മന് ചാണ്ടിയുടെ ചിത്രത്തില് വിളക്ക് തെളിയിച്ചതിന് ശേഷമാണ് തിരുവനന്തപുരം പതുപ്പള്ളി ഹൗസില് നിന്ന് രാവിലെ ചാണ്ടി ഉമ്മന് ഇറങ്ങിയത്. അതേസമയം പഴവങ്ങാടി ആറ്റുകാല് ക്ഷേത്രങ്ങളില് ആദ്യം ദര്ശനം നടത്തി. പിന്നീട് പാളയം മസ്ജിദിലും ശേഷം സെന്റ് ജോര്ജ് പള്ളികളിലും കയറിയാണ് ചാണ്ടി ഉമ്മന് നിയമസഭയില് എത്തിയത്.