ഫഹദ് ഫാസിലിന് 41 ആം പിറന്നാള്‍ സമ്മാനവുമായി ‘പുഷ്പ 2’ ചിത്രത്തിന്റെ അണിയറ പ്രവർത്തകർ. പുഷ്പ രണ്ടാം ഭാഗത്തിലെ ഫഹദിന്റെ ക്യാരക്ടർ പോസ്റ്ററാണ് താരത്തിന്റെ പിറന്നാൾ ദിവസം അണിയറ പ്രവർത്തകർ പുറത്ത് വീട്ടിരിക്കുന്നത്. ഭന്‍വര്‍ സിങ്ങ് ഷെഖാവത് എന്ന ക്രൂരനായ പൊലീസുകാരനായി ഇത്തവണയും ഫഹദ് ഞെട്ടിക്കുമെന്നുള്ള കാര്യത്തോട് നൂറ് ശതമാനം ഉറപ്പ് നൽകുമെന്ന് പോസ്റ്റർ വ്യക്തമാക്കുന്നു.
ഒന്നാം ഭാഗത്തില്‍ ഏറെ പ്രശംസ നേടിയ താരത്തിന്റെ പൊലീസ് വേഷം രണ്ടാം ഭാഗത്തിലും മികച്ച പ്രകടനം കാഴ്ചവയ്ക്കുമെന്നാണ് പ്രേക്ഷക പ്രതീക്ഷ. മാമന്നനാണ് ഫഹദിന്റേതായി ഒടുവില്‍ പുറത്തിറങ്ങിയ ചിത്രം. സുകുമാർ ആണ് പുഷ്പ യുടെ സംവിധാനം. രശ്മിക മന്ദാന നായികയാവുന്ന ചിത്രം മൈത്രി മൂവി മേക്കേഴ്‌സിന്‍റെ ബാനറില്‍ നവീൻ യേർനേനിയും വൈ. രവിശങ്കറും ചേർന്നാണ് നിർമിക്കുന്നത്.
അല്ലു അർജുനെയും രശ്മികയെയും ഫഹദിനെയും കൂടാതെ ധനുഞ്ജയ്, റാവു രമേഷ്, അനസൂയ ഭരദ്വാജ്, സുനിൽ, അജയ് ഘോഷ് തുടങ്ങിയവരും പ്രധാന വേഷത്തിൽ എത്തുന്ന ചിത്രത്തിന്റെ സംഗീതം ദേവി ശ്രീ പ്രസാദ് (ഡി.എസ്.പി) ആണ്. ഛായാഗ്രഹണം മിറോസ്ലാവ് കുബ ബ്രോസെക്ക്, എഡിറ്റിങ് നിർവഹിക്കുന്നത് കാർത്തിക ശ്രീനിവാസ് ആണ്. പിആര്‍ഒ ആതിരാ ദില്‍ജിത്ത് തുടങ്ങിയവരാണ് മറ്റ് അണിയറ പ്രവർത്തകർ.
