സംസ്ഥാനത്തെ സ്കൂളുകള് നാളെ തുറക്കും.42 ലക്ഷത്തോളം കുട്ടികളാണ് നാളെ സ്കൂളുകളിലേക്കെത്തുക. പ്രവേശനോത്സവത്തിന്റെ സംസ്ഥാനതല ഉദ്ഘാടനം തിരുവനന്തപുരം മലയിന്കീഴ് ഗവ.വിഎച്ച്എസ്എസില് നാളെ രാവിലെ 9ന് മുഖ്യമന്ത്രി പിണറായി വിജയന് നിര്വഹിക്കും.
ലളിതമായി വ്യത്യസ്തരീതിയില് പ്രവേശനോത്സവം ഒരുക്കാനാണ് സ്കൂളുകള്ക്ക് സര്ക്കാര് നല്കിയിട്ടുള്ള നിര്ദേശം. ഈ അധ്യയന വര്ഷം 220 പ്രവൃത്തി ദിനങ്ങളാക്കാനുള്ള നീക്കത്തില് നിന്നും അധ്യാപക സംഘടനകളുടെ എതിര്പ്പിനെത്തുടര്ന്ന് സര്ക്കാര് പിന്മാറി. വിദ്യാലയങ്ങളില് 204 പ്രവൃത്തി ദിനങ്ങള് ഉറപ്പാക്കാനാണ് ഇപ്പോള് ധാരണയായിട്ടുള്ളത്.
പൊതുവിദ്യാലയങ്ങളില് 12 ശനിയാഴ്ചകള് കൂടി പ്രവൃത്തിദിനമായിരിക്കും. തുടര്ച്ചയായി അഞ്ചു പ്രവൃത്തിദിനങ്ങള് വരാത്ത ആഴ്ചകളിലെ ശനിയാഴ്ചയും പ്രവൃത്തിദിനമാക്കാനാണ് അധ്യാപക സംഘടനാ പ്രതിനിധികള് ഉള്പ്പെട്ട വിദ്യാഭ്യാസ ഗുണമേന്മാ സമിതി (ക്യുഐപി) ശുപാര്ശ ചെയ്തിട്ടുള്ളത്. വിദ്യാഭ്യാസ കലണ്ടറിന് അംഗീകാരം നല്കാന് ചേര്ന്ന ക്യുഐപി യോഗമാണ് ഈ ശുപാര്ശ നല്കിയത്. ഇതനുസരിച്ച് തുടര്ച്ചയായ ആറു ദിവസം പ്രവൃത്തിദിനമാകില്ല.