ബിജെപി സർക്കാർ കർണാടകയിലെ വിദ്യാഭ്യാസ സ്ഥാപനങ്ങളിൽ ഏർപ്പെടുത്തിയ ഹിജാബ് നിരോധനം നീക്കാനൊരുങ്ങി കോൺഗ്രസ് സർക്കാർ. മന്ത്രിസഭ വികസനം പൂർത്തിയായശേഷം ഇതുമായി ബന്ധപ്പെട്ട നടപടികളിലേക്ക് സർക്കാർ നീങ്ങുമെന്ന് ഔദ്യോഗിക വൃത്തങ്ങൾ അറിയിച്ചു. ഒരാഴ്ചക്കകം മന്ത്രിസഭ വികസനവും വകുപ്പു വിഭജനവും പൂർത്തിയാവുമെന്നാണ് പുറത്ത് വരുന്ന വിവരങ്ങൾ. കോൺഗ്രസിന്റെ തെരഞ്ഞെടുപ്പ് വാഗ്ദാനങ്ങളിൽ പ്രധാന വിഷയം ഹിജാബ് നിരോധനം നീക്കലാണ്.
അതേസമയം വർഗീയ വിഭജന ലക്ഷ്യത്തോടെ ബിജെപി സർക്കാർ കൊണ്ടുവന്ന എല്ലാ നിയമങ്ങളും ഉത്തരവുകളും പിൻവലിക്കുമെന്ന് കോൺഗ്രസ് പ്രകടന പത്രികയിൽ വ്യക്തമാക്കിയിരുന്നു. എന്നാൽ ഹിജാബ് നിരോധനവുമായി ബന്ധപ്പെട്ട് മുസ്‍ലിം വിദ്യാർഥിനികൾ സമർപ്പിച്ച ഹർജിയിൽ സുപ്രീംകോടതി ഭിന്നവിധി പുറപ്പെടുവിച്ചിരുന്നു. തുടർന്ന് നൽകിയ ഹർജി സുപ്രീംകോടതി ബെഞ്ചിന്റെ പരിഗണനയിലാണ്. കൂടാതെ കർണാടകയിലെ ഹിജാബ് വിഷയത്തിൽ ആംനസ്റ്റി ഇന്റർനാഷനൽ കഴിഞ്ഞദിവസം ആശങ്ക പ്രകടിപ്പിച്ചിരുന്നു. ഇക്കാര്യം കർണാടക ഉപമുഖ്യമന്ത്രി ഡികെ ശിവകുമാറിനോട് സൂചിപ്പിച്ചപ്പോൾ ഹിജാബ് നയപരമായ വിഷയമാണെന്നും അതിനെക്കുറിച്ച് ഇപ്പോൾ പ്രതികരിക്കുന്നില്ല എന്നുമായിരുന്നു മറുപടി.
എന്നാൽ നിയമസഭ സമ്മേളനത്തിനു ശേഷം മാധ്യമപ്രവർത്തകരെ കണ്ട മന്ത്രി പ്രിയങ്ക് ഖാർഗെ ഹിജാബ് നിരോധനവും ഗോവധ നിരോധനവുമടക്കം കോൺഗ്രസ് സർക്കാർ പിൻവലിക്കുമെന്ന് ഉറപ്പ് പറഞ്ഞു. കൂടാതെ കർണാടകയിലെ സമാധാനാന്തരീക്ഷത്തിന് ഭംഗം വരുത്താൻ ശ്രമിച്ചാൽ ആർഎസ്എസിനെയും ബജ്റങ് ദളിനെയും നിരോധിക്കുമെന്നും ബിജെപിക്ക് അത് സ്വീകരിക്കാൻ പറ്റില്ലെങ്കിൽ അവർ പാകിസ്താനിലേക്ക് പോകട്ടെയെന്നും പ്രിയങ്ക് ഖാർഗെ പറഞ്ഞു. കർണാടകയെ സ്വർഗമാക്കുമെന്നത് കോൺഗ്രസിന്റെ വാഗ്ദാനമാണ്. സമാധാനം തകർത്താൽ അത് ആർഎസ്എസാണോ ബജ്റങ് ദളാണോ എന്ന് നോക്കില്ല. നിയമം കൈയിലെടുത്താൽ ഉറപ്പായും നിരോധനം കൊണ്ടുവരും. പ്രകടന പത്രികയിലുള്ളത് പോലെ സംസ്ഥാനത്തെ സമാധാനത്തിന് ഭംഗം വരുത്തുന്ന എല്ലാ സംഘടനകളെയും നിരോധിക്കുമെന്നും അദ്ദേഹം കൂട്ടിച്ചേർത്തു.
