പ്രാർത്ഥനാ നമസ്കാര പായ ഇനി ഡിജിറ്റൽ. ലോകത്തിലെ പ്രഥമ ‘സ്മാർട് എജ്യൂക്കേഷണൽ നമസ്കാര പായ’ വികസിപ്പിച്ചതിനുള്ള ഗോൾഡൻ പുരസ്കാരം ദോഹ പൗരൻ സ്വന്തമാക്കി. ഈ മാസം ആദ്യ വാരം മലേഷ്യയിൽ നടന്ന പ്രധാന ശാസ്ത്ര-സാങ്കേതിക പ്രദർശനമായ 34-ാമത് ഐടെക്സ് മലേഷ്യ-2023 യിലാണ് സ്മാർട് നമസ്കാര പായ വികസിപ്പിച്ചെടുത്ത ദോഹ സ്വദേശി അബ്ദുൽറഹ്മാൻ ഖാമിസിന് സ്വർണ മെഡൽ പുരസ്കാരമായി ലഭിച്ചത്.
‘സജദ’ എന്നാണ് ഈ ഡിജിറ്റൽ നമസ്കാര പായയ്ക്ക് നൽകിയിരിക്കുന്ന പേര്. പുതിയ തലമുറയുടെ ഇസ്ലാമിക് വിദ്യാഭ്യാസത്തിന് വലിയ തോതിൽ സ്മാർട് നിസ്കാര പായ ഗുണകരമാകുമെന്നാണ് വിലയിരുത്തൽ. കൂടാതെ കുട്ടികൾക്കും പുതിയ മുസ്ലീം വിശ്വാസികൾക്കും പ്രാർഥന നിർവഹിക്കുന്നത് എങ്ങനെയാണ് എന്ന് മനസ്സിലാക്കാനും വേഗത്തിൽ പ്രാർഥനയുടെ അടിസ്ഥാന പാഠങ്ങൾ പഠിച്ചെടുക്കാനും സജദ സഹായകമാകും. പ്രാർത്ഥനാ ക്രമങ്ങളും ഖുർ ആൻ വചനങ്ങളും പൂർണ്ണമായി മനസിലാക്കി തന്നെ നമസ്കാരം ചെയ്യാമെന്നതാണ് സജദയുടെ ഏറ്റവും വലിയ പ്രത്യേകത.
കഴിഞ്ഞ മാസം ജനീവയിൽ വച്ച് നടന്ന കണ്ടുപിടിത്തങ്ങളുടെ രാജ്യാന്തര പ്രദർശനത്തിലും സജദയ്ക്ക് സ്വർണ മെഡൽ ലഭിച്ചിരുന്നു. കൂടാതെ കുവൈത്തിൽ നടന്ന 13-ാമത് രാജ്യാന്തര ഇൻവെൻഷൻ മേളയിൽ പുതിയ ആശയത്തിന് ലഭിച്ച സ്വർണ മെഡൽ ആണ് സജദയ്ക്ക് ലഭിച്ച പ്രഥമ പുരസ്കാരം. ഗൾഫ് കോർപറേഷൻ കൗൺസിൽ സെക്രട്ടറി ജനറലിന്റെ പേറ്റന്റ് ഓഫിസ് പുരസ്കാരവും സജദയ്ക്ക് ലഭിച്ചിട്ടുണ്ട്. ഇസ്ലാമിക് വിദ്യാഭ്യാസം ശക്തിപ്പെടുത്താനും ഖത്തറിലെ സാങ്കേതിക ഗവേഷണങ്ങളും വികസനങ്ങളും പ്രോത്സാഹിപ്പിക്കാനും കൂടിയാണ് പുതിയ കണ്ടുപിടിത്തത്തിലൂടെ ലക്ഷ്യമിട്ടതെന്ന് ഖാമിസ് പറഞ്ഞു.
സജദയിൽ ഇരുപതോളം പ്രാർഥനകൾ
അത്യാധുനിക സാങ്കേതിക വിദ്യ ഉപയോഗിച്ച് ദിവസേനയുള്ള അഞ്ച് നേരത്തെ നമസ്കാരവും റമസാനിലെ തറാവീഹ്, രാത്രി സമയങ്ങളിലെ നമസ്കാരങ്ങൾ എന്നിവയും ഉൾപ്പെടെ ഇരുപതോളം പ്രാർഥനകളാണ് സജദയിൽ ക്രമീകരിച്ചിരിക്കുന്നത്. പ്രാർഥനകളുടെ കൃത്യമായ പരിശീലനമാണ് സജദയിലൂടെ നൽകുന്നത്.
പ്രാർത്ഥനാ നമസ്കാര പായയിൽ കയറി നിന്ന് ഓരോ ഘട്ടങ്ങളിലും ചൊല്ലേണ്ട പ്രാർഥനാക്രമം, ഖുർ ആൻ അധ്യായങ്ങൾ, ഓരോ പ്രാർഥനാ സമയങ്ങളിലും വിശ്വാസി നിർബന്ധമായും ചൊല്ലേണ്ടത്, ഓരോ പ്രാർഥനയ്ക്കും എങ്ങനെയാണ് ഇരിക്കേണ്ടത് തുടങ്ങിയ കാര്യങ്ങൾ ഡിജിറ്റൽ നിസ്കാര പായയ്ക്ക് മുൻപിലെ എൽഇഡി സ്ക്രീനിൽ തെളിഞ്ഞു വരും. നമസ്കാര പായയിൽ ഘടിപ്പിച്ചിരിക്കുന്ന സ്പീക്കറുകളിലൂടെ ഓഡിയോ വിവരണവും ഉണ്ടാവും.
അതേസമയം പ്രാർഥന ചൊല്ലുന്നതിലെ തെറ്റുകൾ പെട്ടെന്ന് തിരിച്ചറിഞ്ഞ് തിരുത്താനായി നൂതന പ്രഷർ സെൻസറുകളും സജദയിൽ ഉപയോഗിച്ചിട്ടുണ്ട്. അറ്റൻഷൻ ഡെഫിസിറ്റ്-ഹൈപ്പറാക്ടീവ് ഡിസോർഡർ (എഡിഎച്ച്ഡി) ഉള്ള കുട്ടികൾക്ക് വേണ്ടിയുള്ള ഇന്റർ ആക്ടീവ് സവിശേഷതകൾ, കാൽമുട്ട് അല്ലെങ്കിൽ സന്ധി വേദനയുള്ളവർ തെന്നി വീഴാതിരിക്കാൻ സുരക്ഷിതമായ പ്രത്യേക പ്രതലം എന്നിവയാണ് സജദിലെ മറ്റ് പ്രധാന പ്രത്യേകതകൾ. കൂടാതെ മൂന്ന് വ്യത്യസ്ത ഭാഷാ ഓപ്ഷനുകളും സജദയിലുണ്ട്.