2026ലെ ലോകകപ്പിന്റെ ആവേശമറിയിച്ച് ലോഗോയും മുദ്രാവാക്യവും പുറത്തുവിട്ട് ഫിഫ. ലോസ് ആഞ്ചൽസിലെ ഗ്രിഫിത്ത് ഒബ്സർവേറ്ററിയിൽ നടന്ന ചടങ്ങിലാണ് ലോഗോ അനാച്ഛാദനം ചെയ്ത്. യു.എസ്, മെക്സിക്കോ, കാനഡ എന്നീ രാജ്യങ്ങൾ സംയുക്തമായാണ് ഇത്തവണ ടൂർണമെന്റിന് ആതിഥ്യം വഹിക്കുന്നത്. ഫിഫ അധ്യക്ഷൻ ജിയാന്നി ഇൻഫാന്റിനോയാണ് പരിപാടികൾക്ക് നേതൃത്വം നൽകിയത്.
ഫിഫ ലോകകപ്പ് കിരീടത്തിന്റെ മാതൃക ചേർത്താണ് ലോഗോ തയാറാക്കിയത്. ടൂർണമെന്റ് നടക്കുന്ന വർഷത്തെ സൂചിപ്പിച്ച് വെള്ള നിറത്തിൽ 26 എന്നും അതിന് മുകളിൽ ലോകകപ്പ് കിരീടവും നൽകിയാണ് ലോഗോ ഒരുക്കിയത്. ആതിഥേയരാജ്യങ്ങളുടെ നിറം ഇത്തവണ ലോഗോയിൽ ചേർത്തിട്ടില്ല. പകരം കറുപ്പ് നിറമാണ് പശ്ചാത്തലമായി നൽകിയിരിക്കുന്നത്.
‘വീ ആർ 26’ എന്നാണ് ഇത്തവണത്തെ ലോകകപ്പ് മുദ്രാവാക്യം. ടൂർണ്ണമെന്റിൽ ലോകത്തെ സ്വാഗതം ചെയ്യാൻ നമ്മൾ ഒറ്റക്കെട്ടാണെന്ന് ജിയാന്നി പറഞ്ഞു. ഫിഫ ലോകകപ്പ് ചരിത്രത്തിലെ ഏറ്റവും മികച്ച ടൂർണമെന്റാണ് 2026-ൽ നടക്കാൻ പോകുന്നത്. ടൂർണമെന്റിൽ പങ്കെടുക്കുന്ന ഓരോ രാജ്യത്തിനും ആതിഥ്യമരുളുന്ന രാജ്യത്തിനും ഫിഫ ലോകകപ്പ് ചരിത്രത്തിൽ തങ്ങളുടേതായ അധ്യായം കുറിക്കാനുള്ള അവസരമായിരിക്കും ഇതെന്നും അദ്ദേഹം കൂട്ടിച്ചേർത്തു.
2026-ൽ ടൂ ടീമുകളുടെ എണ്ണം 32ൽ നിന്ന് 48 ആയി ഉയരും. 16 നഗരങ്ങളിലായിരിക്കും കളി നടക്കുക. ഇതിൽ 11 എണ്ണം യു.എസിലും മൂന്നെണ്ണം മെക്സിക്കോയിലും രണ്ടെണ്ണം കാനഡയിലുമായിരിക്കും.
