2026ൽ നടക്കുന്ന ലോകകപ്പിൽ അർജന്റീനയ്ക്ക് വേണ്ടി താൻ കളിക്കില്ലെന്ന് ഫുട്ബോൾ ഇതാഹാസം ലയണൽ മെസി. ഖത്തറിലേത് തന്റെ അവസാന ലോകകപ്പായിരുന്നുവെന്നും താരം പറഞ്ഞു.
‘അമേരിക്കയിൽ നടക്കുന്ന അടുത്ത ലോകകപ്പിൽ പങ്കെടുക്കാൻ സാധിക്കുമെന്ന് തോന്നുന്നില്ല. പക്ഷേ, കാണികളുടെ കൂട്ടത്തിൽ ഞാൻ ഉണ്ടാകും. അർജന്റീനക്കായി അവസാന വേൾഡ്കപ്പ് മത്സരവും കളിച്ചുവെന്നാണ് വിശ്വസിക്കുന്നത്. ഭാവിയിൽ എന്ത് സംഭവിക്കുമെന്ന് എനിക്കറിയില്ല. ഞാൻ ആഗ്രഹിച്ചതുപോലെ ലോകകപ്പ് ഞാൻ നേടി. കരിയറിൽ ഇപ്പോൾ ഞാൻ വളരെയധികം സന്തോഷവാനാണ്. അതുതന്നെയാണ് എനിക്ക് ഏറ്റവും പ്രധാനപ്പെട്ടത്’ താരം പറഞ്ഞു.
ഖത്തർ ലോകകപ്പിൽ കിരീടം നേടിയ അർജന്റീന ടീമിന്റെ ക്യാപ്റ്റനായിരുന്നു മെസി. 2006 മുതൽ മെസി അർജന്റീന ടീമിനൊപ്പം വേൾഡ് കപ്പ് കളിക്കുന്നുണ്ട്. കഴിഞ്ഞ ദിവസം പിഎസ്ജിയുമായുള്ള കരാർ അവസാനിപ്പിച്ചതായും മെസി അറിയിച്ചിരുന്നു. എന്നാൽ മെസിയുടെ ഈ തീരുമാനം ആരാധകരിൽ ഏറെ നിരാശയാണ് സൃഷ്ടിച്ചിരിക്കുന്നത്. 2026 ലോകകപ്പിൽ മെസി കളിക്കണമെന്ന ആഗ്രഹമാണ് ആരാധകർ പങ്കിടുന്നത്.
