ദക്ഷിണാഫ്രിക്കയ്ക്കെതിരെയുള്ള ഇന്ത്യയുടെ രണ്ടാം ട്വന്റി20 ഇന്ന്. ഇന്ത്യൻ സമയം വൈകിട്ട് 8.30-ന് പോർട്ട് എലിസബത്തിലെ സെന്റ് ജോർജ് പാർക്കിലാണ് മത്സരം നടക്കുന്നത്. ഡർബനിലെ കിങ്സ്‌മീഡിൽ നടക്കാനിരുന്ന ഇന്ത്യ – ദക്ഷിണാഫ്രിക്ക ടി20 പരമ്പരയിലെ ആദ്യ മത്സരം ഞായറാഴ്ച കനത്ത മഴമൂലം ഉപേക്ഷിച്ചിരുന്നു.
ഇന്നത്തെ മത്സരത്തിലും മഴ വില്ലനാകുമോ എന്ന സംശയമാണ് ഉയരുന്നത്. ഞായറാഴ്ച ഇന്ത്യൻ സമയം വൈകിട്ട് 7.30-നായിരുന്നു ആദ്യ ടി20 മത്സരം ആരംഭിക്കേണ്ടിയിരുന്നത്. എന്നാൽ 9.30 ആയിട്ടും മഴ തുടർന്നതോടെയാണ് ടോസിടാൻ പോലും അവസരം ലഭിക്കാതെ മത്സരം ഉപേക്ഷിക്കാൻ തീരുമാനിച്ചത്.
മൂന്ന് മത്സരങ്ങളാണ് ഇന്ത്യ – ദക്ഷിണാഫ്രിക്ക പരമ്പരയിലുള്ളത്. മൂന്ന് മത്സരങ്ങളുൾപ്പെടുന്ന ടി20 പരമ്പരക്കുശേഷം മൂന്ന് മത്സരങ്ങളടങ്ങിയ ഏകദിന പരമ്പരയിലും അതിനുശേഷം രണ്ട് മത്സരങ്ങളടങ്ങിയ ടെസ്റ്റ് പരമ്പരയിലും ഇന്ത്യ കളിക്കും. മൂന്ന് ഫോർമാറ്റിനും മൂന്ന് വ്യത്യസ്ത ടീമുകളെയാണ് ഇന്ത്യ ഇത്തവണ അയച്ചിരിക്കുന്നത്.
