പുരുഷ ടീം ബാഡ്മിന്റൻ ഫൈനലിൽ ഇന്ത്യയ്ക്ക് വെള്ളി. ചൈനയാണ് സ്വർണം സ്വന്തമാക്കിയത്. പരിക്ക് മൂലം ലോക 7-ാം നമ്പർ താരം പ്രണോയിക്ക് കളിക്കാനാവാതെ പോയതാണ് ഇന്ത്യയെ പിന്നോട്ടുവലിച്ചത്. ആദ്യ സിംഗിൾസിൽ ലക്ഷ്യ സെന്നും ആദ്യ ഡബിൾസിൽ സാത്വിക്സായ്രാജ് രങ്കിറെഡി-ചിരാഗ് ഷെട്ടി സഖ്യവും വിജയിച്ചു. എന്നാൽ സിംഗിൾസ് മത്സരങ്ങളിൽ കിഡംബി ശ്രീകാന്ത്, മിഥുൻ മഞ്ജുനാഥ് എന്നിവരും ഡബിൾസിൽ ധ്രുവ് കപില- സായ്പ്രതീക് സഖ്യവും പരാജയപ്പെട്ടതോടെ ഇന്ത്യ പിന്നോട്ടാകുകയായിരുന്നു.
ആദ്യ സിംഗിൾസിൽ പൊരുതി ജയിച്ച ലക്ഷ്യ സെൻ വഴി ഇന്ത്യയ്ക്ക് ആശ്വാസമാണ് ലഭിച്ചത്. 22-20,14-21, 21-18 എന്നിങ്ങനെയായിരുന്നു പോയിന്റ് നില. ലോക രണ്ടാം നമ്പർ സഖ്യമായ ലിയാങ് വെയ് കെങ്-വാങ് ചാങ് എന്നിവരെ നേരിട്ടുള്ള ഗെയിമുകൾക്ക് വീഴ്ത്തി (21-15, 21-8) സാത്വിക്-ചിരാഗ് സഖ്യം ഇന്ത്യയുടെ പ്രതീക്ഷ വർധിപ്പിച്ചു. ശ്രീകാന്തിനെ ഓൾ ഇംഗ്ലണ്ട് ലി ഷിഫെങ് വീഴ്ത്തിയതോടെ (24-22, 21-9) ചൈന തിരിച്ചുവരികയായിരുന്നു. ധ്രുവ് കപില സായ് പ്രതീക് സഖ്യവും കീഴടങ്ങിയതോടെ 21-6, 21-15 പോയന്റിന് ചൈന 2-2ന് ഒപ്പമെത്തി. നിർണായക സിംഗിൾസ് മത്സരത്തിൽ വെങ് ഹോങ് യാങ്ങിനെതിരെ നേരിട്ടുള്ള സെറ്റുകൾക്കായിരുന്നു മിഥുന്റെ തോൽവി.
