തിമിരത്തിനുള്ള ശസ്ത്രക്രിയയ്ക്ക് ശേഷം പതിനെട്ടോളം രോഗികൾക്ക് കാഴ്ച നഷ്ടപ്പെട്ടെന്ന് റിപ്പോർട്ട്. രാജസ്ഥാനിലെ സവായ് മാൻ സിംഗ് (എസ്എംഎസ്) ആശുപത്രിക്കെതിരെയാണ് ആരോപണം ഉയർന്നിരിക്കുന്നത്.
രാജസ്ഥാനിലെ ഏറ്റവും വലിയ സർക്കാർ ആശുപത്രിയാണ് എസ്എംഎസ് ആശുപത്രി. രാജസ്ഥാൻ സർക്കാരിൻറെ കീഴിലുള്ള ചിരഞ്ജീവി ഹെൽത്ത് സ്കീമിൻറെ ഭാഗമായി ഇവിടെ വച്ച് നടത്തിയ തിമിര ശസ്ത്രക്രിയയ്ക്ക് പിന്നാലെയാണ് കാഴ്ച നഷ്ടപ്പെട്ടുവെന്ന പരാതിയുമായി രോഗികൾ എത്തിയത്.
തങ്ങളുടെ ഭാഗത്ത് നിന്ന് ചികിത്സാപ്പിഴവ് ഉണ്ടായിട്ടില്ല എന്ന് തന്നെയാണ് ഇപ്പോഴും ആശുപത്രി അധികൃതർ ഉറപ്പിച്ച് പറയുന്നത്. പക്ഷേ സംഭവം വിവാദമായതോടെ തങ്ങൾ അന്വേഷണം ആരംഭിച്ചിട്ടുണ്ടെന്ന് ആശുപത്രി അറിയിച്ചിട്ടുണ്ട്. ഒരു കണ്ണിൻറെ കാഴ്ച നഷ്ടപ്പെട്ടതായാണ് എല്ലാവരും പരാതിപ്പെടുന്നത്. ഒന്നിന് പിറകെ ഒന്നായി രോഗികൾ പരാതിയുമായി എത്തുകയായിരുന്നു. പലർക്കും വീണ്ടും ശസ്ത്രക്രിയ നടത്തിയതായാണ് സൂചന. പലരും അസഹനീയമായ കണ്ണ് വേദനയെ തുടർന്നും ആശുപത്രിയിലെത്തി. ഇവരിൽ ചിലർക്ക് മൂന്നാമത്തെ തവണ വരെ ശസ്ത്രക്രിയ നടത്തിയെന്നും പരാതിയുണ്ട്. എങ്കിലും ആർക്കും പോസിറ്റീവായ ഫലം കിട്ടിയില്ല.
