ശ്രീറാം വെങ്കിട്ടരാമനെ ആലപ്പുഴ ജില്ലാ കലക്ടർ സ്ഥാനത്തുനിന്ന് മാറ്റി. ശ്രീറാമിനെ സിവിൽ സപ്ലൈസ് കോർപറേഷൻ ജനറൽ മാനേജറായാണ് സ്ഥാനം മാറ്റി നിയമിച്ചത്. പട്ടിക ജാതി വികസന വകുപ്പ് ഡയറക്ടറായിരുന്ന വി ആർ കൃഷ്ണ തേജ മൈലവരപ്പയാണ് പുതിയ ആലപ്പുഴ കലക്ടർ.
മാധ്യമപ്രവർത്തകൻ കെ എം ബഷീറിനെ വാഹനമിടിച്ച് കൊലപ്പെടുത്തിയ കേസിലെ പ്രതിയായ ശ്രീറാമിനെ ആലപ്പുഴ കലക്ടറാക്കിയതിനെതിരെ വ്യാപക പ്രതിഷേധം ഉയർന്നതോടെയാണ് സ്ഥാനം മാറ്റിയത്. ഐഎഎസ് തലപ്പത്ത് നടന്ന അഴിച്ചുപണിയുടെ ഭാഗമായാണ് ആരോഗ്യ വകുപ്പ് ജോയിന്റ് സെക്രട്ടറിയായിരുന്ന ശ്രീറാം വെങ്കട്ടരാമനെ ആലപ്പുഴ ജില്ലാ കലക്ടറായി സർക്കാർ നിയമിച്ചത്.
ആലപ്പുഴ കലക്ടറായിരുന്ന രേണു രാജിനെ എറണാകുളത്തേക്ക് സ്ഥലം മാറ്റിയിരുന്നു. കലക്ടറായി ചുമതലയേൽക്കാൻ വന്നത് മുതൽ ശ്രീറാമിനെതിരെ കടുത്ത പ്രതിഷേധം ഉയർരുകയും ശ്രീറാം ചുമതലയേൽക്കാൻ എത്തിയപ്പോൾ യൂത്ത് കോൺഗ്രസ് പ്രവർത്തകർ കരിങ്കൊടി കാട്ടി പ്രതിഷേധിക്കുകയുമൊക്കെ ചെയ്തു.
എറണാകുളം സ്വദേശി ശ്രീറാം, 2013 ഐഎഎസ് ബാച്ചാണ്. മുൻപ് എംപ്ലോയ്മെന്റ് ആൻഡ് ട്രെയ്നിങ് ഡയറക്ടറായും തിരുവല്ല, ദേവികുളം സബ് കലക്ടറായും പ്രവർത്തിച്ചയാളാണ് ശ്രീറാം വെങ്കട്ടരാമൻ.
