മുൻ മന്ത്രി സജി ചെറിയാന്റെ ഭരണഘടന വിരുദ്ധ പരാമർശവുമായി ബന്ധപ്പെട്ട് പ്രതിപക്ഷ നേതാവ് വി ഡി സതീശൻ നടത്തിയ പ്രസ്താവനയിൽ മാപ്പു പറയണം എന്നാവശ്യപ്പെട്ട് ആര്‍എസ്എസ് നോട്ടീസ് അയച്ചു. പ്രസ്താവന തിരുത്തി 24 മണിക്കൂറിനകം മാപ്പ് പറഞ്ഞില്ലെങ്കിൽ നിയമനടപടി സ്വീകരിക്കുമെന്ന് നോട്ടീസില്‍ പറയുന്നു. ആര്‍എസ്എസിന്‍റെ സ്ഥാപക നേതാവ് ഗോള്‍വാള്‍ക്കറുടെ ബഞ്ച് ഓഫ് തോട്ട്സ് എന്ന പുസ്തകത്തിലെ വാചകങ്ങളാണ് സജി ചെറിയാന്‍ കടമെടുത്തതെന്നായിരുന്നു വി ഡി സതീശൻ പറഞ്ഞത്. ആര്‍എസ്എസ് പ്രാന്ത സംഘചാലക് കെ കെ ബലറാമാണ് വി ഡി സതീശന് നോട്ടീസ് അയച്ചത്.
ബഞ്ച് ഓഫ് തോട്ട്സ് എന്ന പുസ്കത്തില്‍ സജി ചെറിയാന്‍ പറഞ്ഞ വാക്കുകള്‍ അതേപോലെ എഴുതിയിട്ടുണ്ട് എന്നായിരുന്നു പ്രതിപക്ഷ നേതാവ് വി ഡി സതീശന്റെ പ്രസ്താവന. സജി ചെറിയാന്‍ പറഞ്ഞ വാക്കുകൾ ഗോള്‍വാള്‍ക്കറുടെ ബഞ്ച് ഓഫ് തോട്ട്സില്‍ ഇല്ലെന്ന് ആര്‍എസ്എസ് നോട്ടീസില്‍ വ്യക്തമാക്കുന്നു. ബഞ്ച് ഓഫ് തോട്ട്സില്‍ എവിടെയാണ് സജി ചെറിയാന്‍ പറഞ്ഞ അതേ വാക്കുകളുള്ളതെന്ന് വി ഡി സതീശൻ വ്യക്തമാക്കണമെന്നും അതിന് കഴിയില്ലെങ്കിൽ പ്രസ്താവന പിന്‍വലിക്കണമെന്നുമാണ് ആവശ്യം. അല്ലാത്ത പക്ഷം ശക്തമായ നിയമനടപടി സ്വീകരിക്കേണ്ടി വരുമെന്നും നോട്ടീസിൽ മുന്നറിയിപ്പ് നൽകുന്നുണ്ട് ആർഎസ്എസ്.
അതേസമയം ആര്‍എസ്എസ് അയച്ച നോട്ടീസ് അവജ്ഞയോടെ തള്ളുന്നുവെന്ന് വി ഡി സതീശൻ പ്രതികരിച്ചു. കെ കെ ബലറാം അയച്ച നോട്ടീസ് വിചിത്രമാണെന്നും വി ഡി സതീശൻ പറഞ്ഞു.
