ലോക്സഭാ തിരഞ്ഞെടുപ്പിന് മുമ്പ് പാർട്ടി പ്രഖ്യാപനം നടത്താനൊരുങ്ങി നടൻ വിജയ്. ആരാധക സംഘടനയായ വിജയ് മക്കൾ ഇയക്കത്തെ രാഷ്ട്രീയ പാർട്ടിയാക്കി മാറ്റാൻ ചെന്നൈക്ക് സമീപം പനയൂരിൽ ചേർന്ന വിജയ് മക്കൾ ഇയക്കം നേതൃയോഗം തീരുമാനിച്ചു.
എന്നാൽ ലോക്സഭാ തിരഞ്ഞെടുപ്പിൽ വിജയ് മത്സരിക്കുന്നതിന് സാധ്യത കുറവാണെന്നാണ് സൂചന. പകരം ഏതെങ്കിലുമൊരു സഖ്യത്തിന് പിന്തുണ നൽകുന്നതിനെക്കുറിച്ച് ആലോചിക്കുന്നതായാണ് റിപ്പോർട്ട്. ഇതുമായി ബന്ധപ്പെട്ട നിലപാട് സംബന്ധിച്ചും യോഗത്തിൽ ചർച്ചകൾ നടന്നു. പാർട്ടി രൂപവത്കരണ ചർച്ചകളിൽ തമിഴ്‌നാട് കൂടാതെ പുതുച്ചേരി, കേരളം, ആന്ധ്ര, കർണാടകം എന്നിവിടങ്ങളിലെ ആരാധകസംഘടനാ നേതാക്കളും പങ്കെടുത്തിരുന്നു.
വിജയ് മക്കൾ ഇയക്കത്തിന് നിലവിൽ തമിഴ്‌നാട്ടിൽ താലൂക്ക് തലങ്ങളിലെ സംഘടനകൾക്ക് പുറമെ ഐ.ടി, അഭിഭാഷക, മെഡിക്കൽ രംഗത്തും പോഷകസംഘടനകളുമുണ്ട്. സിനിമകളിൽ കേന്ദ്രസർക്കാരിനെ വിമർശിച്ചതിന്റെ പേരിൽ വിജയ് ശക്തമായ പ്രതിഷേധം നേരിട്ടതിനാൽ ബി.ജെ.പി അനുകൂലനിലപാടെടുക്കാനുള്ള സാധ്യത വിരളമാണ്. അതോടൊപ്പം മുമ്പ് കോൺഗ്രസുമായി അടുപ്പമുണ്ടായിരുന്നെങ്കിലും മാറിയ രാഷ്ട്രീയ സാഹചര്യത്തിൽ ഇവരോട് എന്ത് നിലപാടെടുക്കുമെന്നതിലും ഇതുവരെ വ്യക്തത വന്നിട്ടില്ല.
