രാജ്യത്തെ വിലക്കയറ്റത്തിനെതിരെ കോൺഗ്രസിന്റെ പ്രതിഷേധ പരിപാടികൾ ഇന്ന്. രാജ്യ തലസ്ഥാനത്തും സംസ്ഥാന കേന്ദ്രങ്ങളിലുമാണ് പ്രതിഷേധ പരിപാടികൾ സംഘടിപ്പിച്ചിട്ടുള്ളത്. ഡൽഹിയിൽ എംപിമാർ അടക്കമുള്ള കോൺഗ്രസ് നേതാക്കൾ രാഷ്ട്രപതി ഭവനിലേക്ക് മാർച്ച് നടത്തും. വിലക്കയറ്റ വിഷയത്തിൽ പാർലമെന്റിൽ നടന്ന ചർച്ചയുമായി ബന്ധപ്പെട്ട് തെറ്റായ വിവരങ്ങളാണ് മന്ത്രി നൽകിയത് എന്നതടക്കമുള്ള ആരോപണങ്ങൾ ഉയർത്തിയാണ് പ്രതിഷേധം.
കനത്ത മഴയുടെ പശ്ചാത്തലത്തിൽ കേരളത്തിൽ ഇന്ന് നടത്താനിരുന്ന സമരപരിപാടികൾ മാറ്റിവച്ചു. ഡൽഹിയിൽ കോൺഗ്രസ് പ്രഖ്യാപിച്ചിരിക്കുന്ന സമരപരിപാടികൾ കാരണം കനത്ത സുരക്ഷാ സംവിധാനമാണ് ഇതിനകം തന്നെ പൊലീസ് എല്ലാ മേഖലയിലും ഏർപ്പെടുത്തിയിരിക്കുന്നത്. പ്രതിഷേധം സംഘടിപ്പിക്കാൻ കോൺഗ്രസ് നൽകിയ അപേക്ഷ ഡൽഹി പൊലീസ് തള്ളിയിരുന്നു. രാഹുൽ ഗാന്ധി അടക്കമുള്ള കോൺഗ്രസ് എംപിമാർ രാജ്യതലസ്ഥാനത്ത് നടക്കുന്ന ഇന്നത്തെ വിവിധ സമരപരിപാടികളുടെ ഭാഗമാകും.
പാർലമെന്റിലും ഇന്ന് വിഷയം ഉന്നയിക്കുമെന്ന് കോൺഗ്രസ് വ്യക്തമാക്കി. വിലക്കയറ്റ വിഷയത്തിൽ രാജ്യസഭയിലും ലോക്സഭയിലും കോൺഗ്രസ് അടിയന്തര പ്രമേയത്തിന് നോട്ടീസും നൽകി. കേന്ദ്ര ഏജൻസികൾ നടത്തുന്ന അന്വേഷണത്തിന് എതിരായ അടിയന്തര പ്രമേയ നോട്ടീസും കോൺഗ്രസിന്റെതായി ഇന്ന് ഇരുസഭകളിലും എത്തും. സഭ നിർത്തിവെച്ച് ഈ വിഷയങ്ങൾ ചർച്ച ചെയ്യാൻ തയ്യാറായില്ലെങ്കിൽ ശക്തമായ പ്രതിഷേധം നടത്താനാണ് ഇന്ന് പാർലമെന്റിൽ കോൺഗ്രസിന്റെ തീരുമാനം.
