യൂട്യൂബ് വ്ളോഗറെ ഭീഷണിപ്പെടുത്തിയെന്ന പരാതിയിൽ നടൻ ബാലയ്ക്കെതിരെ പൊലീസ് കേസ്. ചെകുത്താൻ എന്ന പേരിൽ വ്ളോഗ് ചെയ്യുന്ന അജു അലക്‌സിനെയും സുഹൃത്തിനെയും തോക്ക് ചൂണ്ടി ഭീഷണിപ്പെടുത്തി എന്നാണ് കേസ്. അജുവിന്റെ സുഹൃത്ത്‌ അബ്ദുൽ ഖാദർ ആണ് പരാതിക്കാരൻ.
ആറാട്ട് അണ്ണൻ എന്ന് വിളിപ്പേരുള്ള സന്തോഷ് വർക്കിയെയും കൊണ്ടാണ് ബാല തൻറെ റൂമിൽ വന്നതെന്നും ഒപ്പം രണ്ട് ഗുണ്ടകൾ ഉണ്ടായിരുന്നുവെന്നും അജു അലക്സ് പ്രതികരിച്ചു. തൃക്കാക്കര പൊലീസാണ് കേസ് എടുത്തത്. തനിക്കെതിരെ അജു അലക്സ് വീഡിയോ ചെയ്തതിലെ വിരോധമാണ് ബാല വീട്ടിൽ വന്ന് ഭീഷണപ്പെടുത്താൻ കാരണമെന്നാണ് എഫ്ഐആർ.
“നടൻ ബാല ഞാൻ താമസിക്കുന്ന റൂമിൽ വന്നു. ഞാൻ അവിടെ ഇല്ലായിരുന്നു. അവിടെ താമസിക്കുന്ന എൻറെ സുഹൃത്തിനെതിരെ തോക്ക് ചൂണ്ടി. അവനെ ഭീഷണിപ്പെടുത്തി. എന്നെ കൊല്ലുമെന്ന് പറഞ്ഞാണ് പോയിരിക്കുന്നത്. വീട്ടിലുള്ള സാധനങ്ങളൊക്കെ വലിച്ചെറിഞ്ഞു. കൂടെ രണ്ട് ഗുണ്ടകൾ ഉണ്ടായിരുന്നു. ആറാട്ട് അണ്ണൻ എന്ന് വിളിക്കുന്ന സന്തോഷ് വർക്കിയെയും കൂട്ടിക്കൊണ്ടാണ് അദ്ദേഹം വന്നത്. സന്തോഷ് വഴി കാണിച്ച് കൊടുക്കാൻ വന്നതാണ്. സന്തോഷിൻറെ മൊബൈലിൽ നിന്നാണ് പിന്നീട് ഇവർ വിളിക്കുന്നത്. സന്തോഷ് ഇപ്പോഴും അവരുടെ കൈയിലാണെന്ന് തോന്നുന്നു. ആറാട്ടണ്ണനെ കൊണ്ട് മാപ്പ് പറയിക്കുന്ന ഒരു വീഡിയോ ബാല കഴിഞ്ഞ ദിവസം പോസ്റ്റ് ചെയ്തിരുന്നു. അതിനെക്കുറിച്ച് ഞാൻ ഒരു ട്രോൾ വീഡിയോയും ഇട്ടിരുന്നു. അത് ഡിലീറ്റ് ചെയ്യണമെന്ന് പറഞ്ഞാണ് ഇപ്പോൾ ബാല ഈ കയ്യാങ്കളിയൊക്കെ കാണിക്കുന്നത്”, അജു അലക്സ് പ്രതികരിച്ചു.
എന്നാൽ മോശമായി വ്ളോഗ് ചെയ്യരുതെന്ന് പറയാനാണ് അജുവിന്റ ഫ്ലാറ്റിൽ പോയതെന്നാണ് ബാലയുടെ പ്രതികരണം. തോക്ക് ചൂണ്ടി ഭീഷണിപ്പെടുത്തിയിട്ടില്ലെന്നും ബാല പ്രതികരിച്ചു. അജുവിൻറെ മുറിയിൽ എത്തിയ വീഡിയോയും സോഷ്യൽ മീഡിയയിലൂടെ ബാല പങ്കുവച്ചിട്ടുണ്ട്. പൊലീസ് സ്റ്റേഷനിൽ പോകും എന്ന് അറിഞ്ഞ് തന്നെയാണ് വീഡിയോ എടുത്തത് എന്നും ചെറിയ കുട്ടികളെ ഓർത്ത് നിങ്ങളുടെ നാവ് കുറച്ച് കുറയ്ക്കൂ. ഇത് മുന്നറിയിപ്പ് അല്ല, തീരുമാനമാണ് എന്നും ബാല വീഡിയോയിൽ പറയുന്നുണ്ട്.
