എമിറേറ്റുകളിൽ കഴിഞ്ഞ ദിവസങ്ങളിലായി ഏറ്റവും കൂടുതൽ മഴ ലഭിച്ചിട്ടുണ്ട്. അതുകൊണ്ട് തന്നെ ക്ലൗഡ് സീഡിംഗ് കിംവദന്തികൾ നിഷേധിച്ചുകൊണ്ട് രംഗത്ത് വന്നിരിക്കുകയാണ് യുഎഇയുടെ നാഷണൽ സെൻ്റർ ഓഫ് മെറ്റീരിയോളജി (എൻസിഎം). ഈ കാലയളവിൽ ക്ലൗഡ് സീഡിംഗ് പ്രവർത്തനങ്ങൾക്കായി പൈലറ്റുമാരെ അയച്ചിട്ടില്ല എന്ന് വ്യക്തമാക്കുന്നതായി കാലാവസ്ഥാ വിദഗ്‌ദ്ധൻ അറിയിച്ചു.
രാജ്യത്തുടനീളം പേമാരി ജനജീവിതം താറുമാറാക്കിയിരിക്കുകയാണ്. ഈ സാഹചര്യത്തിൽ ചൊവ്വാഴ്ച ക്ലൗഡ് സീഡിംഗ് ദൗത്യങ്ങളൊന്നും നടത്തിയിട്ടില്ല എന്ന് എൻസിഎമ്മിലെ ഡോ അഹമ്മദ് ഹബീബ് അറിയിച്ചു. രാജ്യം വർഷം മുഴുവനും ക്ലൗഡ് സീഡിംഗ് പ്രവർത്തനങ്ങൾ നടത്തുന്നുണ്ട്. എങ്കിലും ശക്തമായ കൊടുങ്കാറ്റുകളുടെ സമയത്തോ അല്ലെങ്കിൽ മിന്നലിന് ഉയർന്ന അപകടസാധ്യതയുള്ളപ്പോഴോ അത്തരത്തിലുള്ള എല്ലാ ദൗത്യങ്ങളും താൽക്കാലികമായി നിർത്തിവച്ചിരിക്കുകയാണ്. ഇത് പ്രാഥമികമായി സുരക്ഷാ ആശങ്കകളും പ്രായോഗിക പരിമിതികളും മൂലമാണെന്നും എൻസിഎം കൂട്ടിച്ചേർത്തു.
