അന്താരാഷ്ട്ര ബഹിരാകാശ നിലയത്തിലെ ദൗത്യം പൂർത്തിയാക്കി അടുത്ത മാസം സുൽത്താൻ അൽ നെയാദി ഭൂമിയിലേക്കു മടങ്ങും. എന്നാൽ അടുത്ത മാസം ഏത് ദിവസം തിരിച്ചുവെന്ന തീയതിയിൽ വ്യക്തതയില്ല. ഓഗസ്റ്റ് അവസാന വാരമോ സെപ്റ്റംബർ ആദ്യമോ ആയിരിക്കും മടക്കയാത്ര. സുൽത്താൻ അൽ നെയാദി ബഹിരാകാശ നിലയത്തിലെത്തിയിട്ട് ഓഗസ്റ്റ് 3ന് 5 മാസം പൂർത്തിയാക്കും.
നാസയിലെ മറ്റു ശാസ്ത്രജ്ഞർക്കൊപ്പം 200 പരീക്ഷണങ്ങളിലാണ് സുൽത്താൻ പങ്കാളിയായത്. യുഎഇ സർവകലാശാലകൾക്കു വേണ്ടി 19 പരീക്ഷണങ്ങൾ നടത്തുന്നുണ്ട്. ഗുരുത്വാകർഷണം കുറ‍ഞ്ഞ സാഹചര്യത്തിൽ ഹൃദയത്തിന്റെ പ്രവർത്തനം എങ്ങനെയെന്നതായിരുന്നു പ്രധാന പരീക്ഷണം. ഹൃദ്രോഗ ചികിത്സാ രംഗത്ത് ഗുണം ചെയ്യുന്നതാണ് പരീക്ഷണം.
മാർച്ച് 3ന് ആണ് സുൽത്താൻ ബഹിരാകാശ നിലയത്തിലെത്തിയത്. ബഹിരാകാശ നിലയത്തിൽ ഏറ്റവും കൂടുതൽ ദിവസം ചെലവഴിച്ച ആദ്യ അറബ് വംശജൻ എന്ന നേട്ടമാണ് ഇതിനോടകം തന്നെ സുൽത്താൻ തന്റെ പേരിലെഴുതി ചരിത്രം കുറിച്ചത്. കൂടെ ബഹിരാകാശത്ത് 7 മണിക്കൂർ നടന്നതിന്റെ ചരിത്രവും. ബഹിരാകാശ നടത്തം നടത്തുന്ന ആദ്യ അറബ് വംശജനാണ് സുൽത്താൻ.
