ടാക്സ് നിരക്കിൽ മാറ്റം വരുത്താനൊരുങ്ങി ദുബായിലെ ടോൾ ഓപ്പറേറ്ററായ സാലിക് കമ്പനി. 2025 ജനുവരി മുതൽ എല്ലാ ദിവസവും അർധരാത്രിക്ക് ശേഷം റോഡ് ടാക്സ് സൗജന്യമാക്കാനാണ് തീരുമാനം. അതേസമയം, തിരക്കേറിയ സമയങ്ങളിൽ സാലിക്ക് നിരക്ക് ആറ് ദിർഹമായി ഉയരുകയും ചെയ്യും.
എല്ലാ ദിവസവും രാത്രി ഒന്ന് മുതൽ പുലർച്ചെ ആറ് വരെയാണ് ദുബായിൽ സാലിക്ക് നിരക്ക് സൗജന്യമാവുക. എന്നാൽ പ്രവർത്തി ദിവസങ്ങളിൽ തിരക്ക് വർധിക്കുന്ന സമയങ്ങളായ രാവിലെ ആറ് മുതൽ പത്ത് വരെയും വൈകിട്ട് നാല് മുതൽ രാത്രി എട്ട് വരെയും ടോൾ ഗേറ്റ് കടന്നുപോകാൻ ആറ് ദിർഹം നൽകേണ്ടി വരും. തിരക്കില്ലാത്ത സമയങ്ങളിൽ നിലവിലെ നിരക്കായ നാല് ദിർഹം നൽകിയാൽ മതി.
പൊതു അവധിയല്ലാത്ത ഞായറാഴ്ചകളിൽ നാല് ദിർഹമായിരിക്കും സാലിക്ക് നിരക്ക്. പൊതുഅവധികൾ, പ്രധാനപരിപാടി നടക്കുന്ന ദിവസങ്ങൾ എന്നിവയിൽ എല്ലാ സമയത്തും നാല് ദിർഹം ഈടാക്കാനാണ് തീരുമാനം.
