2024-ലെ ലോകത്തിലെ ഏറ്റവും സുരക്ഷിതമായ നഗരങ്ങളുടെ പട്ടികയിൽ അബുദാബി ഒന്നാം സ്ഥാനത്ത്‌. നംബിയോയുടെ ഓൺലൈൻ ഡാറ്റാബേസ് പ്രകാരമാണിത്. അജ്മാൻ, ദുബായ്, റാസൽഖൈമ എന്നിവയുൾപ്പെടെ മറ്റ് മൂന്ന് എമിറേറ്റുകൾ ആഗോളതലത്തിൽ മികച്ച ആറ് നഗരങ്ങളിൽ ഇടംപിടിക്കുകയും ചെയ്തു. സുരക്ഷാ സൂചികയിൽ ഏറ്റവും മികച്ചതും (86.8) കുറ്റകൃത്യങ്ങളുടെ തോതിൽ അവസാനവുമാണ് (13.1) അബുദാബി.
82.2 കുറ്റകൃത്യ സൂചികയും 17.8 സുരക്ഷയുമായി തെക്കേ അമേരിക്കൻ രാജ്യമായ വെനസ്വേലയിലെ കാരക്കാസാണ് ഏറ്റവും മോശം സ്കോർ നേടിയത്. ഒരു നിശ്ചിത നഗരത്തിലോ രാജ്യത്തിലോ ഉള്ള കുറ്റകൃത്യങ്ങളുടെ മൊത്തത്തിലുള്ള കണക്കാണ് ക്രൈം ഇൻഡക്സ്. നംബിയോയുടെ കുറ്റകൃത്യ സൂചികയിൽ 329 നഗരങ്ങളെ റാങ്ക് ചെയ്തിട്ടുണ്ട്.
20-ൽ താഴെയുള്ള കുറ്റകൃത്യങ്ങളുടെ തോത് വളരെ താഴ്ന്നതും, 20-നും 40-നും ഇടയിലുള്ള കുറ്റകൃത്യങ്ങളുടെ തോത് കുറവും, 40-നും 60-നും ഇടയിൽ മിതമായതും, 60-നും 80-നും ഇടയിൽ ഉയർന്നതും, 80-ൽ കൂടുതൽ കുറ്റകൃത്യങ്ങളുടെ തോത് വളരെ ഉയർന്നതും ആയാണ് കണക്കാക്കുന്നതെന്ന് നംബിയോ പറഞ്ഞു. സുരക്ഷാ സൂചിക കുറ്റകൃത്യ സൂചികയ്ക്ക് വിപരീതമാണ്. നഗരത്തിന് ഉയർന്ന സുരക്ഷാ സൂചികയുണ്ടെങ്കിൽ, അത് വളരെ സുരക്ഷിതമായാണ് കണക്കാക്കപ്പെടുന്നത്.
മികച്ച സുരക്ഷാ മാനദണ്ഡങ്ങൾ
2017 മുതൽ ലോകത്തിലെ ഏറ്റവും സുരക്ഷിതമായ നഗരമെന്ന നേട്ടം അബുദാബി സ്വന്തമാക്കിയിട്ടുണ്ട്. മികച്ച സുരക്ഷാ മാനദണ്ഡങ്ങൾ നടപ്പിലാക്കുന്നതിലും പൗരന്മാർക്കും താമസക്കാർക്കും സന്ദർശകർക്കും ഉയർന്ന ജീവിതനിലവാരം നിലനിർത്തുന്നതിനുള്ള എമിറേറ്റിൻ്റെ ആഗോള നേതൃത്വത്തെയുമാണ് എട്ടാം തവണയും നഗരത്തിൻ്റെ ഏറ്റവും സുരക്ഷിതമായ റാങ്ക് പ്രതിഫലിപ്പിക്കുന്നതെന്ന് അബുദാബി പോലീസിലെ ഉന്നത ഉദ്യോഗസ്ഥർ അഭിപ്രായപ്പെട്ടു.
കുറ്റകൃത്യങ്ങൾ, പ്രതിസന്ധികൾ, ദുരന്തങ്ങൾ, സുരക്ഷാ സംഭവങ്ങൾ എന്നിവ പ്രവചിക്കുക, കുറ്റകൃത്യങ്ങളെ ചെറുക്കുന്നതിനും കണ്ടെത്തുന്നതിനുമുള്ള സാങ്കേതിക വിദ്യകൾ ഉപയോഗിച്ച് സുസ്ഥിര സുരക്ഷയ്ക്കും അബുദാബി പോലീസ് പ്രാധാന്യം നൽകിവരുന്നുണ്ട്. എമിറേറ്റിൽ സുരക്ഷ നിലനിർത്തുന്നതിന് അതീവ പ്രാധാന്യം നൽകിയ നേതൃത്വത്തിൻ്റെ പിന്തുണയാണ് ലോകത്തിലെ ഏറ്റവും മികച്ച റാങ്കിംഗ് നേടിയതെന്ന് അബുദാബി പോലീസ് ഡയറക്ടർ ജനറൽ മേജർ ജനറൽ മക്തൂം അലി അൽ ഷരീഫി പറഞ്ഞു.
