യുഎഇയിൽ വേനൽക്കാലം ഔദ്യോഗികമായി ആരംഭിക്കുന്ന തീയതി വെളിപ്പെടുത്തി നാഷണൽ സെന്റർ ഓഫ് മെറ്റീരിയോളജി. ജൂൺ 21-ന് വേനൽക്കാലമെത്തുമെന്നാണ് വിലയിരുത്തൽ.
മെയ് മാസത്തെ അപേക്ഷിച്ച് ജൂൺ മാസത്തിലെ വായുവിന്റെ താപനില രാജ്യത്തിന്റെ ഭൂരിഭാഗം പ്രദേശങ്ങളിലും ഏകദേശം 2 ° C മുതൽ 3 ° C വരെ വർദ്ധിക്കും. ചില പ്രദേശങ്ങളിൽ ഉച്ചക്ക്ശേഷം ചിലപ്പോൾ മഴ പെയ്യാൻ സാധ്യതയുണ്ടെന്നും മെറ്റീരിയോളജി അധികൃതർ അഭിപ്രായപ്പെട്ടു. മെയ് മാസത്തെ അപേക്ഷിച്ച് ഈ മാസത്തിൽ പ്രത്യേകിച്ച് രണ്ടാം പകുതിയിൽ ഈർപ്പം കുറയും. അതിനാൽ മൂടൽമഞ്ഞ് രൂപപ്പെടാനുള്ള സാധ്യത കുറവാണ്.
ജൂണിലെ ശരാശരി വായു താപനില 33 ° C നും 35.7 ° C നും ഇടയിലായിരിക്കും. പരമാവധി വായുതാപനില 39.7 ° C നും 42.7 ° C നും ഇടയിലും ഏറ്റവും കുറഞ്ഞ വായുതാപനില 26.6 മുതൽ 29.2 ° C വരെയുമായിരിക്കും. വേനൽക്കാലം എത്തുന്നതിന് മുന്നോടിയായി ഗൾഫ് രാജ്യങ്ങളിൽ പുറം തൊഴിലാളികൾക്ക് നിർബന്ധിത ഇടവേള പ്രബല്യത്തിൽ വന്നുകൊണ്ടിരിക്കുകയാണ്.
