വിസ കാലാവധി കഴിഞ്ഞതിന് ശേഷവും ഹജ്ജ് നിർവഹിക്കാൻ മക്കയിൽ തങ്ങുന്ന ഉംറ തീർഥാടകരുണ്ടോ? എങ്കിൽ പിടി വീഴും, തീർച്ച. സൗദി അറേബ്യയിൽ താമസിക്കുന്ന ഉംറ വിസക്കാർക്ക് ഈ വിസ ഉപയോഗിച്ച് ഹജ്ജ് നിർവഹിക്കാൻ കഴിയില്ലെന്ന് ഹജ്ജ്, ഉംറ മന്ത്രാലയം മുന്നറിയിപ്പ് നൽകിയിരിക്കുകയാണ്. ഉംറ തീർഥാടകർ വിസയുടെ കാലാവധി കൃത്യമായി പാലിച്ചിരിക്കണം. കാലാവധി അവസാനിക്കുന്നതിനു മുൻപ് തന്നെ മക്ക വിടുകയും വേണം. പ്രത്യേകിച്ച് ഇവർ മസ്ജിദുൽ ഹറാം പരിസരത്തുണ്ടാവാൻ പാടില്ല. അല്ലാത്തപക്ഷം നിയമനടപടി നേരിടേണ്ടിവരുമെന്നും മന്ത്രാലയം വ്യക്തമാക്കി. അതേസമയം ഹജ്ജുമായി ബന്ധപ്പെട്ട നിയന്ത്രണങ്ങൾ ലംഘിക്കുന്നത് തടയാൻ സുരക്ഷ വകുപ്പ് തീവ്രശ്രമം തുടർന്ന് വരികയാണ്.
ഇതിന്റെ ഭാഗമായി മക്കയ്ക്കടുത്തുള്ള ചെക്ക് പോസ്റ്റുകളിൽ പരിശോധന കർശനമാക്കിയിട്ടുണ്ട്. മാത്രമല്ല, വ്യാജവും തെറ്റിദ്ധരിപ്പിക്കുന്നതുമായ ഹജ്ജ് പ്രചാരണങ്ങളുടെ പ്രമോട്ടർമാരെ പിടികൂടാൻ വ്യാപകമായ നിരീക്ഷണവും മന്ത്രാലയം ആരംഭിച്ചിട്ടുണ്ട്. വ്യാജ ഹജ്ജ് പരസ്യങ്ങൾ നൽകിയ ചിലയാളുകൾ ഇതിനോടകം തന്നെ പൊലീസ് പിടിയിലാവുകയും ചെയ്തു. അനുമതിയില്ലാതെ ഹജ്ജ് ചെയ്യാൻ എത്തുന്നതുൾപ്പടെ നിയമ ലംഘനം നടത്തുന്നവർക്കുള്ള ശിക്ഷ ദുൽഖഅദ് 25 മുതൽ അടുത്ത വർഷം ദുൽഹജ്ജ് 14 വരെയുള്ള കാലാവധിയിൽ നടപ്പാക്കാൻ തുടങ്ങുമെന്ന് ആഭ്യന്തര മന്ത്രാലയം അടുത്തിടെ പ്രഖ്യാപിച്ചിരുന്നു.
ഹജ്ജ്-ഉംറ വിസ, അറിഞ്ഞിരിക്കേണ്ട ചില കാര്യങ്ങൾ
1) ഹജ്ജിന്‍റെ ദിവസങ്ങളിൽ ഹജ്ജ് പെർമിറ്റ് കൈവശമുള്ളവർക്കൊഴികെ മറ്റാർക്കും ഉംറ പെർമിറ്റ് അനുവദിക്കുകയില്ല.
2)മക്ക, മധ്യമേഖല, റുസൈഫയിലെ ഹറമൈൻ ട്രെയിൻ സ്റ്റേഷൻ, പുണ്യസ്ഥലങ്ങൾ, സുരക്ഷാ നിയന്ത്രണ കേന്ദ്രങ്ങൾ, സോർട്ടിങ് സെന്‍ററുകൾ, താൽക്കാലിക സുരക്ഷാ നിയന്ത്രണ കേന്ദ്രങ്ങൾ എന്നിവിടങ്ങളിൽ വെച്ച് ഹജ്ജ് പെർമിറ്റ് ഇല്ലാതെ പിടിയിലാകുന്നവർക്ക് 10,000 റിയാൽ പിഴ ചുമത്തും.
3) നിയമ ലംഘനം നടത്തുന്നത് വിദേശികളാണെങ്കിൽ നാടുകടത്തലും സൗദിയിലേക്ക് പുനഃപ്രവേശന വിലക്കും ശിക്ഷയായി നൽകും. നിയമലംഘനം ആവർത്തിച്ചാൽ പിഴ ഇരട്ടിയായിരിക്കും.
