പ്രത്യേക പെർമിറ്റ് ഇല്ലാതെ ഹജ്ജ് തീർത്ഥാടനത്തിൽ പങ്കെടുക്കാൻ ശ്രമിച്ചാൽ പിടി വീഴും, ഉറപ്പ് ! അനധികൃതമായി മക്കയിലേക്ക് പ്രവേശിക്കാൻ ശ്രമിക്കുന്നവർക്കും പെർമിറ്റ് ഇല്ലാതെ ഹജ്ജ് നിർവഹിക്കാൻ എത്തുന്നവർക്കും 10000 റിയാൽ പിഴ ചുമത്തുമെന്ന് സൗദി അധികൃതർ അറിയിച്ചു. സൗദി ആഭ്യന്തര മന്ത്രാലയമാണ് ഇത്തരമൊരു മുന്നറിയിപ്പ് ആവർത്തിച്ചത്.
എന്നാൽ നിയമലംഘനം ആവർത്തിക്കുന്നവർക്ക് പിഴ തുക കൂടും. ഒരു ലക്ഷം റിയാൽ പിഴ ചുമത്തുമെന്നാണ് അധികൃതർ അറിയിച്ചത്. 2024 ജൂൺ 2 മുതൽ ജൂൺ 20 വരെയുള്ള കാലയളവിൽ ഹജ്ജ് പെർമിറ്റ് കൂടാതെ മക്കയിലേക്ക് പ്രവേശിക്കുന്നവർക്കെല്ലാം ഈ പിഴ ഉൾപ്പടെയുള്ള നിയമനടപടികൾ നേരിടേണ്ടി വരും.
മക്ക നഗരം, അറഫാത്, മുസ്ദലിഫ, സെൻട്രൽ ഹറം മേഖല, മിന, റുസൈഫയിലെ ഹറമൈൻ റെയിൽവേ സ്റ്റേഷൻ, സെക്യൂരിറ്റി കണ്ട്രോൾ സെന്ററുകൾ, തീർത്ഥാടകർ ഒത്ത് ചേരുന്ന ഇടങ്ങൾ, താത്കാലിക സെക്യൂരിറ്റി കണ്ട്രോൾ കേന്ദ്രങ്ങൾ തുടങ്ങിയ ഇടങ്ങളിലേക്കുള്ള പ്രവേശനം പൂർണ്ണമായും ഹജ്ജ് പെർമിറ്റുള്ളവർക്ക് മാത്രമായിരിക്കും. ഇതുമായി ബന്ധപ്പെട്ട വീഴ്ചകൾക്ക് പിടിക്കപ്പെടുന്ന മുഴുവൻ പേർക്കും അതായത്, സൗദി പൗരന്മാർ, പ്രവാസികൾ, സന്ദർശകർ ഉൾപ്പടെയുള്ളവർക്ക് ഈ പിഴ ശിക്ഷ ബാധകമായിരിക്കും.
നിയമം പാലിക്കുന്നതിൽ വീഴ്ചകൾ വരുത്തുന്ന പ്രവാസികളെ നാട് കടത്തും. ഇവർക്ക് സൗദി അറേബ്യയിലേക്ക് തിരികെ പ്രവേശിക്കുന്നതിന് നിയമം അനുശാസിക്കുന്ന കാലയളവിലേക്കുള്ള വിലക്കേർപ്പെടുത്തുമെന്നും അധികൃതർ വ്യക്തമാക്കിയിട്ടുണ്ട്. തെറ്റ് ചെയ്യുന്നവർ സൂക്ഷിച്ചോളൂ, ശിക്ഷ ഉറപ്പാണ്.
