സൗദി അറേബ്യക്ക് പുറത്തുള്ള രാജ്യങ്ങളിലെ ഉംറ തീർഥാടകർക്ക് ഇൻഷുറൻസ് പോളിസി നിർബന്ധമാക്കിയതായി സൗദി ഹജ്ജ് – ഉംറ മന്ത്രാലയം വ്യക്തമാക്കി. വിസ ഫീസിൽ ഇതും ഉൾപ്പെടുത്തിയിട്ടുണ്ട്. ഇന്‍ഷുറന്‍സ് ഉടമയ്ക്ക് ഒരു ലക്ഷം റിയാൽ വരെ സമഗ്രമായ കവറേജായിരിക്കും ലഭിക്കുക.
അടിയന്തര ആരോഗ്യപ്രശ്നം, കൊവിഡ് ബാധ, പൊതു അപകടവും മരണവും, വിമാന യാത്ര റദ്ദാക്കൽ അല്ലെങ്കിൽ പുറപ്പെടുന്ന വിമാനത്തിൻ്റെ കാലതാമസം എന്നിവ ഇൻഷുറൻസ് പരിരക്ഷയുടെ പരിധിയിൽ വരുമെന്നും ഹജ്ജ് – ഉംറ മന്ത്രാലയം വ്യക്തമാക്കി.
2022 ജൂലൈ 30ന് ഉംറ സീസൺ ആരംഭിച്ച ശേഷം ഇതുവരെ 20 ലക്ഷത്തിലേറെ ഉംറ വിസകൾ അനുവദിച്ചുകഴിഞ്ഞു. 176 രാജ്യങ്ങളിൽനിന്നുള്ള തീർഥാടകർക്കാണ് ഇതുവരെ വിസ നൽകിയിട്ടുള്ളത്. ഏറ്റവും കൂടുതൽ വിസ അനുവദിച്ചത് ഇന്തോനേഷ്യ, ഇറാഖ്, തുർക്കി എന്നീ രാജ്യങ്ങൾക്കാണ്.
വിദേശ തീർഥാടകർക്ക് ആവശ്യമായ സേവനം നൽകാൻ 150നടുത്ത് ഉംറ കമ്പനികളെ ചുമതലപ്പെടുത്തിയിട്ടുണ്ട്. സ്വന്തം രാജ്യങ്ങളിൽനിന്നുള്ള യാത്ര മുതൽ ഉംറ നിർവഹിച്ച് മടങ്ങുന്നത് വരെ ആവശ്യമായ എല്ലാ സേവനങ്ങളും നൽകുന്നത് ഈ കമ്പനികളായിരിക്കുമെന്ന് ഹജ്ജ്, ഉംറ ദേശീയ കമ്മിറ്റി അംഗം ഹാനി അൽ-ഉമൈരി അറിയിച്ചു.
തീർഥാടകർക്ക് മികച്ച സേവനങ്ങൾ ഒരുക്കണമെന്ന സൽമാൻ രാജാവിൻ്റെ നിർദേശത്തിൻ്റെ അടിസ്ഥാനത്തിലാണ് ഇത്രയധികം കമ്പനികളെ നിയോഗിച്ചത്.
