ദുബായ് ഗ്ലോബ് സോക്കർ അവാർഡുകൾ ഏറ്റുവാങ്ങി ഫുട്ബോൾ ആരാധകരുടെ പ്രിയ താരങ്ങൾ. മാഞ്ചസ്റ്റർ സിറ്റിയുടെ നോർവേ താരം ഏർലിങ് ഹാളണ്ട് മികച്ച കളിക്കാരനുള്ള പുരസ്കാരം ഏറ്റുവാങ്ങി. ആരാധകരുടെ പ്രിയതാരം ഉൾപ്പെടെ മൂന്ന് അവാർഡുകളാണ് ക്രിസ്റ്റ്യാനോ റൊണാൾഡോ സ്വന്തമാക്കിയത്.
ആരാധകരുടെ പ്രിയതാരം, മികച്ച മിഡിലീസ്റ്റ് താരം, മറഡോണ അവാർഡ് എന്നീ മൂന്ന് അവാർഡുകളാണ് റോണാൾഡോ സ്വന്തമാക്കിയത്. ബാഴ്സലോണയുടെ ഐറ്റാന ബോൻമാറ്റി മികച്ച വനിതാ താരമായി തെരഞ്ഞെടുക്കപ്പെട്ടു. ദുബായ് പാം ജുമൈറ അത്ലാന്റിസ് ഹോട്ടലിൽ നടന്ന ചടങ്ങിൽ വെച്ച് ദുബായ് രാജകുമാരൻ ഷെയ്ഖ് മൻസൂറാണ് ദുബായ് ഗ്ലോബ് സോക്കർ അവാർഡുകൾ വിതരണം ചെയ്തത്.
മാഞ്ചസ്റ്റർ സിറ്റിയാണ് മികച്ച പുരുഷ ക്ലബ്. വനിതാ ക്ലബിനുള്ള പുരസ്കാരം ബാഴ്‌സലോണ സ്വന്തമാക്കി. മാഞ്ചസ്റ്റർ സിറ്റിയുടെ റോഡ്‌റി മികച്ച മിഡ്‌ഫീൽഡറായും, എഡേഴ്‌സൻ മികച്ച ഗോൾകീപ്പറായും തെരഞ്ഞെടുക്കപ്പെട്ടു. വിവിധ വിഭാഗങ്ങളിലായി കൂടുതൽ പുരസ്കാരങ്ങൾ സ്വന്തമാക്കിയത് മാഞ്ചസ്റ്റർ സിറ്റിയാണ്.
