ലോക ഫാൽക്കൺ ദിനത്തിനായുള്ള ഉദ്ദേശ്യ പ്രഖ്യാപനത്തിൽ ഒപ്പുവെക്കുന്ന മിഡിൽ ഈസ്റ്റിലെ ആദ്യത്തെ രാജ്യമായി യുഎഇ. യുഎഇ കാലാവസ്ഥാ വ്യതിയാന പരിസ്ഥിതി മന്ത്രാലയത്തിന്റെ പങ്കാളിത്തത്തിൽ റഷ്യയിലെ വ്ലാഡിവോസ്റ്റോക്കിൽ നടന്ന “ഗിർഫാൽക്കൺ” ഫാൽക്കൺ ഡേ ഫോറത്തിലാണ് നീക്കം.
ജൈവവൈവിധ്യം സംരക്ഷിക്കുന്നതിനും പ്രകൃതിദത്ത ആവാസ വ്യവസ്ഥകൾ മെച്ചപ്പെടുത്തുന്നതിനുമുള്ള ആഗോള ശ്രമങ്ങളിൽ വംശനാശഭീഷണി നേരിടുന്ന ജീവികളെ സംരക്ഷിക്കുന്നതിനുള്ള യുഎഇയുടെ പ്രതിജ്ഞാബദ്ധതയെ പ്രതിഫലിപ്പിക്കുന്നതാണ് തീരുമാനം.ഫാൽക്കണുകളെ വളർത്തുന്നതും പരിപാലിക്കുന്നതും അറബ് പൈതൃകത്തിൻ്റെ ഭാഗമാണ്. നൂറ്റാണ്ടുകളായി ഫാൽക്കൺ പക്ഷിക്ക് യുഎഇയുടെ സാംസ്കാരിക സ്വത്വവുമായി ശക്തമായ ബന്ധമുണ്ട്.
വംശനാശഭീഷണി നേരിടുന്ന ജീവികളെ സംരക്ഷിക്കുന്നതിനും അവയുടെ സ്വാഭാവിക ആവാസ വ്യവസ്ഥകൾ നിലനിർത്തുന്നതിനുമുളള ശ്രമങ്ങൾക്ക് അടിവരയിടുന്ന യുഎഇ സിഒപി28-ന് നവംബറിൽ ആതിഥേയത്വം വഹിക്കുന്നതിന് മുന്നോടിയായാണ് ഈ പ്രഖ്യാപനത്തിൽ ഒപ്പുവെച്ചിരിക്കുന്നതെന്ന് കാലാവസ്ഥാ വ്യതിയാന പരിസ്ഥിതി മന്ത്രാലയത്തിലെ ജൈവവൈവിധ്യത്തിനും സമുദ്രജീവി മേഖലയ്ക്കും വേണ്ടിയുള്ള അസിസ്റ്റൻ്റ് അണ്ടർ സെക്രട്ടറി ഡോ. മുഹമ്മദ് സൽമാൻ അൽ ഹമ്മദി പറഞ്ഞു.
ഫാൽക്കണുകളെ നിയമവിരുദ്ധമായി വേട്ടയാടൽ, കടത്ത്, എന്നിവ തടയുക എന്നതും ലോക ഫാൽക്കൺ ദിന പ്രഖ്യാപനം ലക്ഷ്യമിടുന്നു. ശാസ്ത്രീയ ഗവേഷണത്തിലും വിദ്യാഭ്യാസത്തിലും ഏർപ്പെട്ടിരിക്കുന്ന സംഘടനകളുടെ പ്രവർത്തനം ശക്തിപ്പെടുത്തുക, ഫാൽക്കണുകളുടെ ദീർഘകാല സംരക്ഷണത്തിനുള്ള സാമ്പത്തിക സംവിധാനങ്ങൾ വികസിപ്പിക്കുക എന്നിവയും പ്രധാനമാണ്.
യൂറോപ്പ്, ഏഷ്യ, വടക്കേ അമേരിക്ക എന്നിവിടങ്ങളിലെ ധ്രുവ, ഉപധ്രുവ, തണുത്ത മിതശീതോഷ്ണ പ്രദേശങ്ങളിൽ കാണപ്പെടുന്ന ഫാൽക്കണിഡേ കുടുംബത്തിലെ അപൂർവ ഇനങ്ങളിൽ ഒന്നാണ് ജിർഫാൽക്കൺ ലൈം ഫാൽക്കൺ. അവയുടെ സ്വാഭാവിക ആവാസവ്യവസ്ഥയുടെ നഷ്ടം, നാശം, ശിഥിലീകരണം, ഭക്ഷ്യ സ്രോതസ്സുകളുടെ ശോഷണം, നിയമവിരുദ്ധമായ വേട്ടയാടൽ, കടത്ത് എന്നിവ കാരണം അവയുടെ എണ്ണത്തിലുണ്ടായ കുറവിനെക്കുറിച്ച് ഗുരുതരമായ ആശങ്കയുണ്ട്. കൂടാതെ, ഫുഡ് പിരമിഡിന്റെ മുകളിലുള്ള ഒരു വേട്ടക്കാരൻ എന്ന നിലയിൽ ജിർഫാൽക്കൺസ് ജൈവവൈവിധ്യത്തിന്റെയും ആർട്ടിക്ആവാസവ്യവസ്ഥയുടെ സുസ്ഥിരതയുടെയും പ്രധാന സൂചകങ്ങളാണ്.
ഫാൽക്കണുകളെ സംരക്ഷിക്കാൻ കേന്ദ്രീകൃത സംരംഭങ്ങൾ നടത്തിയ ആദ്യത്തെ രാജ്യങ്ങളിലൊന്നാണ് യുഎഇ. അന്തരിച്ച ശൈഖ് സായിദ് ബിൻ സുൽത്താൻ അൽ നഹ്യാൻ ദേശാടന മൃഗങ്ങളെയും പക്ഷികളെയും സംരക്ഷിക്കുന്നതിന് പിന്തുണ നൽകുകയും അവ വംശനാശഭീഷണി നേരിടുന്നില്ലെന്ന് ഉറപ്പാക്കാൻ 1995-ൽ ഫാൽക്കൺ റിലീസ് പ്രോഗ്രാം ആരംഭിക്കുകയും ചെയ്തിരുന്നു.
