കോവിഡ് മഹാമാരിയ്ക്ക് ശേഷം വരാനിരിക്കുന്ന പുതിയ അസുഖത്തെ കുറിച്ച് മുന്നറിയിപ്പുമായി ലോകാരോഗ്യ സംഘടന. കോവിഡ് ആഗോള അടിയന്തരാവാസ്ഥ കുറച്ച് ആഴ്ചകൾക്ക് മുൻപാണ് അവസാനിപ്പിച്ചത്. ലോകരാജ്യങ്ങളോട് മറ്റൊരു മഹാമാരിക്കായി തയാറെടുക്കാനും ലോകരോഗ്യ സംഘടന തലവൻ ടെഡ്രോസ് അദനോം മുന്നറിയിപ്പ് നൽകി.
മനുഷ്യരാശിക്ക് അറിയാത്ത ഒരു സൂക്ഷ്മജീവി വരുത്തുന്ന ഈ അസുഖത്തിന് ലോകാരോഗ്യ സംഘടന നൽകിയിരിക്കുന്ന പേര് ഡിസീസ് എക്സ് എന്നാണ്. 2018 ലാണ് ഈ പേരിന് രൂപം നൽകിയത്. അതേസമയം കോവിഡിനേക്കാൾ മാരകമായിരിക്കും ഡിസീസ് എക്സ് എന്നാണ് വിലയിരുത്തുന്നത്.
2017 ലാണ് ലോകം കാണാനിരിക്കുന്ന മഹാമാരികൾ എന്ന പേരിൽ ലോകാരോഗ്യ സംഘടന അസുഖങ്ങളുടെ പട്ടിക പുറത്തിറക്കിയത്. അതിൽ കോവിഡ്-19, നിപ്പ, എബോള, ലാസ ഫീവർ, മാർബർഗ്, മെർസ്, സാർസ്, സിക്ക എന്നിവയും ഉൾപ്പെടുത്തിയിരുന്നു. ഇതിൽ ഏറ്റവും ഒടുവിലായി ഉൾപ്പെട്ട അസുഖമാണ് ഡിസീസ് എക്സ്. മൃഗങ്ങളിൽ നിന്ന് നേരിട്ട് മനുഷ്യരിലേക്കാകും ഡിസീസ് എക്സ് പകരുക എന്നാണ് നിലവിലെ വിലയിരുത്തൽ. ഇതിനൊപ്പം സോമ്പി വൈറസിനെ കുറിച്ചും ശാസ്ത്ര ലോകം ആശങ്കപ്പെടുന്നുണ്ട്.
