ദുബായില്‍ വാഹനങ്ങൾ ചീറിപ്പായുന്ന റോഡിന് നടുവിൽ തലയണയുമായി ഉറങ്ങാനെത്തിയ യുവാവ് അറസ്റ്റിലായി.. ദേര അൽമുറഖ ബാത്തിലാണ് സംഭവം.. ട്രാഫിക് സിഗ്നലിന് സമീപം നടുറോഡില്‍ യുവാവ് കിടക്കുന്ന ദൃശ്യങ്ങൾ സോഷ്യല്‍ മീഡിയയിലും പ്രചരിച്ചു.
റോഡില്‍ കിടക്കുന്ന യുവാവിന് സമീപം വാഹനങ്ങൾ നിരത്തിയിട്ടതും ദ്യശ്യങ്ങളില്‍ വ്യക്തമായി. തനിക്ക് മരിക്കാന്‍ ഭയമില്ലെന്നും എന്നാല്‍ വിദേശ രാജ്യത്ത്മരിക്കാന്‍ ഭയമാണെന്നും യുവാവ് വീഡിയോയില്‍ പറയുന്നുണ്ട്. എന്നാല്‍ പ്രശ്നം ഗുരതരമായതോടെ യുവാവ് വീഡിയൊ ഡിലീറ്റ് ചെയ്തെങ്കിലും ചുരുങ്ങിയ സമയത്തിനുളളില്‍ നിരവധി ആളുകളാണ് ഷെയര്‍ ചെയ്തത്.
സംഭവത്തില്‍ ദുബായ് പൊലീസ് അതിവേഗം ഇടപെട്ടു. ഏഷ്യന്‍ വംശജനായ യുവാവാണ് അറസ്റ്റിലായത്. സ്വന്തം ജീവനൊപ്പം മറ്റുളളവരുടെ ജീവനും അപകടത്തിലാക്കുന്ന പ്രവര്‍ത്തിയാണ് യുവാവിന്റേതെന്ന് പൊലീസ് പറഞ്ഞു. 2021ലെ ഫെഡറൽ പീനൽ കോഡ് നമ്പർ 31ലെ ആർട്ടിക്കിൾ 399 അനുസരിച്ചാണ് കേസെടുത്തത്.
ടിക് ടോക് സാഹസികതയാണ് യുവാവിന്റെ ഭാഗത്തുനിന്ന് ഉണ്ടായതെന്നും സൂചനയുണ്ട്. ഇത്തരം സംഭവങ്ങൾ ശ്രദ്ധയില്‍ പെട്ടാല്‍ അധികൃതരെ വിവരമറിയിക്കണമെന്നും പൊലീസ് നിര്‍ദ്ദേശം നല്‍കിയിട്ടുണ്ട്.
