വംശനാശ ഭീഷണി നേരിടുന്ന ജീവികളെ വേട്ടയാടുന്നവർക്കെതിരെ കടുത്ത ശിക്ഷാനടപടിയുമായി സൗദി അറേബ്യ. നിയമലംഘകർക്ക് തടവും കനത്ത പിഴയുമാണ് ശിക്ഷയായി ലഭിക്കുകയെന്ന് സൗദി സ്പെഷ്യൽ ഫോഴ്‌സസ് ഫോർ എൻവിറോണ്മെന്റൽ സെക്യൂരിറ്റി അധികൃതർ മുന്നറിയിപ്പ് നൽകി.
വംശനാശ ഭീഷണി നേരിടുന്ന ജീവികളെ വേട്ടയാടുന്നവർക്ക് 10 വർഷം വരെ തടവും 30 ദശലക്ഷം റിയാൽ വരെ പിഴയുമാണ് ചുമത്തപ്പെടുക. വന്യജീവികളെ വേട്ടയാടുന്നതും കൊല്ലുന്നതും ഇത്തരം ജീവികളെയോ അവ ഉപയോഗിച്ച് നിർമ്മിച്ചിട്ടുള്ള വസ്തുക്കളോ കച്ചവടം ചെയ്യുന്നതും സൗദി പരിസ്ഥിതി നിയമങ്ങൾ പ്രകാരം ശിക്ഷ ലഭിക്കാവുന്ന കുറ്റകൃത്യങ്ങളാണ്.
ഇത്തരം നിയമലംഘനം സംബന്ധിച്ച വിവരങ്ങൾ മക്ക, റിയാദ്, അൽ ശർഖിയ എന്നിവിടങ്ങളിൽ നിന്ന് 911 എന്ന നമ്പറിലും സൗദി അറേബ്യയുടെ മറ്റ് പ്രദേശങ്ങളിൽ നിന്ന് 999, 996 എന്നീ നമ്പറുകളിലും പൊതുജനങ്ങൾക്ക് റിപ്പോർട്ട് ചെയ്യാൻ സാധിക്കും. രാജ്യത്തെ പരിസ്ഥിതി നിയമങ്ങളും അതുമായി ബന്ധപ്പെട്ട മാനദണ്ഡങ്ങളും കർശനമായി പാലിക്കാൻ പൊതുജനങ്ങളോട് സ്പെഷ്യൽ ഫോഴ്‌സസ് ഫോർ എൻവിറോണ്മെന്റൽ സെക്യൂരിറ്റി അധികൃതർ ആവശ്യപ്പെട്ടു.
