സൗദി അറേബ്യയിൽ നടക്കാനിരിക്കുന്ന ലോക കേരള സഭ മേഖലാ സമ്മേളനം മാറ്റി. മുഖ്യമന്ത്രി ഉൾപ്പെടെയുള്ളവർക്ക് വിദേശയാത്രക്ക് കേന്ദ്രത്തിന്റെ അനുമതി ലഭിക്കാത്തതിനാലാണ് സമ്മേളനം മാറ്റിയത്. ഒക്ടോബർ 19, 20, 21 തിയ്യതികളിലാണ് സമ്മേളനം നടത്താൻ തീരുമാനിച്ചിരുന്നത്.
ലോക കേരള സഭയുടെ ലണ്ടൻ സമ്മേളനത്തിൽതന്നെ സൗദി അറേബ്യയിലെ മേഖലാ സമ്മേളനവും പ്രഖ്യാപിച്ചിരുന്നു. ജിദ്ദയിലും റിയാദിലും ദമാമിലുമായി നടത്താനിരുന്ന സമ്മേളനത്തിന്റെ യാത്രയ്ക്കും പ്രചാരണത്തിനുമായി സംസ്ഥാന സർക്കാർ 2 കോടി രൂപ ഇതിനോടകം അനുവദിക്കുകയും ചെയ്തിരുന്നു. എന്നാൽ സമ്മേളനത്തിൽ പങ്കെടുക്കേണ്ട മുഖ്യമന്ത്രി ഉൾപ്പെടെയുള്ളവർക്ക് കേന്ദ്രം ഇതുവരെ വിദേശയാത്രക്ക് അനുമതി നൽകിയിട്ടില്ല.
കേന്ദ്രത്തിന്റെ അനുമതി ലഭിച്ചശേഷം സൗദിയിലെ മേഖലാസമ്മേളത്തിന്റെ പുതുക്കിയ തിയതി പ്രഖ്യാപിക്കുമെന്നാണ് ലഭിക്കുന്ന വിവരം. മെയ് മാസത്തിൽ അബുദാബിയിൽ നടന്ന നിക്ഷേപസംഗമത്തിൽ പങ്കെടുക്കുന്നതിനും മുഖ്യമന്ത്രിക്കും മന്ത്രിമാർക്കും കേന്ദ്രം അനുമതി നൽകിയിരുന്നില്ല.
