ഏറെ വിവാദമായ ‘ ദി കേരള സ്റ്റോറി’ ക്ക് ശേഷം പുതിയ ചിത്രം പ്രഖ്യാപിച്ച് സംവിധായകൻ സുദീപ്തോ സെൻ. സഹാറ ഇന്ത്യ പരിവാര്‍ സ്ഥാപകനും വ്യവസായിയുമായ സുബ്രതാ റോയിയുടെ ജീവിതത്തെ ആസ്പദമാക്കിയാണ് പുതിയ ചിത്രം ഒരുങ്ങുന്നത്. ‘സഹാറശ്രീ’ എന്നാണ് ചിത്രത്തിന്റെ പേര്. ചിത്രത്തിന്റെ ടൈറ്റിൽ ടീസർ ഇതിനോടകം തന്നെ പുറത്തുവിട്ടിട്ടുണ്ട്. സുബ്രത റോയിയുടെ 75-ാം ജന്മദിനത്തിലാണ് ചിത്രത്തിന്റെ ടീസർ പങ്കുവെച്ചിരിക്കുന്നത്. എ. ആർ റഹ്മാനാണ് ചിത്രത്തിന്റെ സംഗീത സംവിധാനം നിർവഹിക്കുന്നത്.
അതേസമയം ഇന്ത്യന്‍ സിനിമയിലെ ഒരു സൂപ്പര്‍താരമാകും സുബ്രത റോയിയായി എത്തുക എന്നാണ് വിവരം. ഒരു ബയോപിക് ചിത്രീകരിക്കുക എന്നത് സംവിധായകന്‍ എന്ന നിലയില്‍ എളുപ്പമായ കാര്യമല്ല. എ ആർ റഹ്‌മാൻ, ഗുൽസാർ, സന്ദീപ് സിങ്, ഡോ. ജയന്തിലാൽ ഗദ എന്നിവർ ഒപ്പമുള്ളതിനാല്‍ ഈ വലിയ സിനിമ സാധ്യമാകുമെന്നാണ് പ്രതീക്ഷിക്കുന്നതെന്ന് ടൈറ്റില്‍ ലോഞ്ച് ചടങ്ങില്‍ സുദീപ്തോ സെൻ പറഞ്ഞത്. കൂടാതെ ആരാണ് സുബ്രത റോയിയുടെ റോളില്‍ എത്തുക എന്ന കാര്യം ഉടന്‍ വെളിപ്പെടുത്തമെന്നും അദ്ദേഹം കൂട്ടിച്ചേർത്തു.
ലെജൻഡ് സ്റ്റുഡിയോയും ഡോ.ജയന്തിലാൽ ഗഡയുമാണ് (പെൻ സ്റ്റുഡിയോ) ഈ ചിത്രം അവതരിപ്പിക്കുന്നത്. സന്ദീപ് സിങ് ആണ് ക്രിയേറ്റീവ് പ്രൊഡ്യൂസർ. ഋഷി വിർമാണി, സുദീപ്തോ സെൻ, സന്ദീപ് സിങ് എന്നിവരാണ് ചിത്രത്തിന്റെ തിരക്കഥ. അടുത്ത വർഷം ആദ്യം ചിത്രം തിയറ്ററുകളിലെത്തുമെന്ന് അണിയറ പ്രവർത്തകർ അറിയിച്ചു.
