ഇന്ത്യൻ ക്രിക്കറ്റ് താരം ഋഷഭ് പന്തിന് വാഹനാപകടത്തിൽ ഗുരുതര പരുക്ക്. കാർ ഡിവൈഡറിൽ ഇടിച്ചാണ് അപകടം. വെള്ളിയാഴ്‌ച രാവിലെ ഡൽഹിയിൽ നിന്ന് ഉത്തരാഖണ്ഡിലേക്ക് മടങ്ങുന്നതിനിടെയാണ് അപകടമുണ്ടായത്. അപകടത്തെ തുടർന്ന് കാർ പൂർണമായും കത്തി നശിച്ചു.
റൂർക്കി നർസൻ അതിർത്തിയിൽ വെച്ചാണ് കാർ അപകടത്തിൽപ്പെട്ടത്. അപകട സമയത്ത് പന്ത് തന്നെയാണ് കാറോടിച്ചിരുന്നതെന്നാണ് റിപ്പോര്‍ട്ടുകൾ. ഋഷഭ് പന്തിന്‍റെ നെറ്റിയിലും കാലിലും പരുക്കേറ്റിട്ടുണ്ടെന്നാണ് വിവരം. നിലവിൽ ആരോഗ്യനില തൃപ്‌തികരമാണെന്നും റൂർക്കിയിൽ നിന്ന് ഡൽഹിയിലേക്ക് റഫർ ചെയ്യുകയാണെന്നും ഡോക്ടര്‍മാര്‍ അറിയിച്ചിട്ടുണ്ട്.
താരം സഞ്ചരിച്ച മെഴ്‌സിഡസ് ബെന്‍സ് കാർ ഡിവെെഡറിൽ ഇടിച്ച് തീ പിടിക്കുകയായിരുന്നു. ഉറങ്ങിപ്പോയതാകാം അപകടത്തിന് കാരണമെന്നാണ് പ്രാഥമിക നിഗമനം. ട്വന്‍റി -ട്വന്‍റി ലോകകപ്പിലെ മങ്ങിയ പ്രകടനത്തെ തുടര്‍ന്ന് ശ്രീലങ്കയ്ക്കെതിരായ ടീമില്‍നിന്ന് പന്തിനെ ക‍ഴിഞ്ഞ ദിവസം ഒ‍ഴിവാക്കിയിരുന്നു.
