ആഭിചാര ക്രിയകൾക്കായി എറണാകുളം സ്വദേശികളായ രണ്ട് സ്ത്രീകളെ പത്തനംതിട്ടയിലെത്തിച്ച് നരബലി നടത്തിയെന്ന് തെളിഞ്ഞിരിക്കുന്നു. എറണാകുളം കാലടി സ്വദേശിയായ റോസ്‌ലിൻ, കടവന്ത്ര സ്വദേശിയായ പത്മ എന്നിവരാണ് ബലിയാക്കപ്പെട്ടവർ. പത്തനംതിട്ട ഇലന്തൂർ സ്വദേശിയായ ഭഗവൽസിംഗ്, ഭാര്യ ലൈല എന്നിവർക്ക് വേണ്ടി പെരുമ്പാവൂർ സ്വദേശിയായ മുഹമ്മദ് ഷാഫി സ്ത്രീകളെ എറണാകുളത്ത് നിന്ന് ഇലന്തൂരിലേക്ക് എത്തിക്കുകയായിരുന്നു.
സെപ്തംബർ 27 ന് കടവന്ത്ര സ്വദേശിയായ സ്ത്രീയെ കാണാനില്ലെന്ന പരാതിയിൽ തുടങ്ങിയ അന്വേഷണമാണ് നരബലിയിലേക്ക് എത്തിനിൽക്കുന്നത്. ഇവരുടെ മൊബൈൽ ടവർ ലൊക്കേഷൻ തിരഞ്ഞ് പോയ പൊലീസ് ഇലന്തൂരിലെത്തുകയും തുടർന്നുള്ള വിശദമായ അന്വേഷണത്തിൽ പെരുമ്പാവൂർ സ്വദേശിയും പിന്നാലെ ഇലന്തൂർ സ്വദേശികളായ ദമ്പതികളും പൊലീസ് പിടിയിലാവുകയായിരുന്നു.റോസ്‌ലിനെ ജൂണിലും പത്മയെ സെപ്തംബറിലുമാണ് ഇലന്തൂരിലേക്ക് കൊണ്ടുപോയത്.
തല അറുത്താണ് കൊലപ്പെടുത്തിയതെന്നാണ് പ്രതികൾ നൽകിയ മൊഴി.മൃതദേഹങ്ങൾ വീടിനടുത്തുള്ള പ്രദേശത്ത് കുഴിച്ചിട്ടിരിക്കുകയാണ്. പെരുമ്പാവൂർ സ്വദേശിയായ ഏജൻ്റാണ് മുഖ്യ ആസൂത്രകനെന്നാണ് സൂചന. ഇയാൾ വ്യാജ ഫേയ്സ്ബുക്ക് അക്കൗണ്ട് ഉണ്ടാക്കി ഇലന്തൂർ സ്വദേശിയായ വൈദ്യരെ ആദ്യം പരിചയപ്പെടുകയും വൈദ്യരോട് പെരുമ്പാവൂർ സ്വദേശിയായ ഒരാളെ പ്രീതിപ്പെടുത്തിയാൽ ജീവിതത്തിൽ വലിയ നേട്ടങ്ങളുണ്ടാകുമെന്ന് ഫെയ്സ്ബുക്ക് വഴി വൈദ്യരെ പറഞ്ഞ് വിശ്വസിപ്പിച്ചു. പിന്നീട് ഏജൻ്റ് ഷാഫി തന്നെയാണ് സ്ത്രീകളെ മറ്റ് കാരണങ്ങൾ പറഞ്ഞ് ഇലന്തൂരിലേക്ക് എത്തിച്ചത്.
തൃശൂർ വടക്കഞ്ചേരി സ്വദേശി റോസ്‌ലിൻ ലോട്ടറി കച്ചവടത്തിനായാണ് കാലടിയിലെ മറ്റൂരിലെത്തിയത്. 49 വയസുള്ള ഇവർ മറ്റൂരിൽ പങ്കാളിക്കൊപ്പമായിരുന്നു താമസം. ഓഗസ്റ്റ് 17 ന് ഇവരെ കാണാതായതായി മകൾ പരാതി നൽകുകയായിരുന്നു. പത്മയെ കാണാതായെന്ന പരാതിയിൽ അന്വേഷണത്തിന് ഒടുവിലാണ് റോസ്‌ലിനും സമാനമായ നിലയിൽ കൊല്ലപ്പെട്ടതായി വ്യക്തമായത്.
