ദുബായ് രാജ്യാന്തര വിമാനത്താവളത്തിലെ ടെർമിനൽ ഒന്നിലൂടെ യാത്ര ചെയ്യുന്നവർക്കും വിമാനത്താവള ജീവനക്കാർക്കും സൗജന്യ വൈദ്യപരിശോധന. രോഗങ്ങൾ മുൻകൂട്ടി അറിഞ്ഞ് ചികിത്സ ലഭ്യമാക്കുന്നതിനുള്ള അവബോധം സൃഷ്ടിക്കുകയാണ് ഇതിലൂടെ ലക്ഷ്യമിടുന്നതെന്ന് ദുബായ് താമസ കുടിയേറ്റ വകുപ്പ് അസിസ്റ്റന്റ് ഡയറക്ടർ മേജർ തലാൽ അൽശൻഖീത്വി അറിയിച്ചു.
യാത്രക്കാർക്ക് പുറമേ വിമാനത്താവളത്തിൽ ജോലി ചെയ്യുന്ന വിവിധ ഏജൻസികളുടെ ജീവനക്കാർക്കും സൗജന്യ പരിശോധന ലഭ്യമാണ്. ഇമിഗ്രേഷൻ വിഭാഗവും ‘തദാവീ ‘ മെഡിക്കൽ ഗ്രൂപ്പും സഹകരിച്ചാണ് വിമാനത്താവളത്തിൽ പരിശോധനാ ക്യാംപെയ്ൻ നടത്തുന്നത്. നേത്രരോഗം, എല്ല് രോഗം, ഗൈനക്കോളജി, ഇന്റേണൽ മെഡിസിൻ, വാർധക്യ സഹജമായ രോഗങ്ങൾ, പ്രസവ ശുശ്രൂഷ, ഡർമറ്റോളജി, യൂറോളജി, ഫിസിയോ തെറാപ്പി എന്നിവയെല്ലാം പരിശോധനയുടെ ഭാഗമാണ്.
അതേസമയം രക്തത്തിലെ വൈറ്റമിൻ അളവ്, രക്തസമ്മർദ്ദം, കൊളസ്ട്രോൾ, പ്രമേഹം എന്നിവയും പരിശോധിക്കുമെന്ന് തദാവീ ഗ്രൂപ്പ് ചെയർമാൻ മർവാൻ നാസിർ പറഞ്ഞു. പരിശോധനകളുടെ ഫലം ഉടനടി തന്നെ നൽകും. ഇതിനായി വിദഗ്ധ ഡോക്ടർമാരും നഴ്സുമാരും വിമാനത്താവളത്തിൽ സജ്ജമാണെന്നും മർവാൻ നാസിർ കൂട്ടിച്ചേർത്തു.
