പ്രസംഗിച്ച് കഴിയും മുൻപ് അനൗൺസ്മെന്റ് നടത്തിയതിൽ ക്ഷുഭിതനായി വേദിവിട്ട് ഇറങ്ങി മുഖ്യമന്ത്രി പിണറായി വിജയൻ. കാസർഗോഡ് ബദിയടുക്ക ഫാർമേഴ്‌സ് സർവീസ് സഹകരണ ബാങ്ക് കെട്ടിട ഉദ്ഘാടനത്തിലാണ് സംഭവം. പരിപാടിയിൽ അധ്യക്ഷനായ മുഖ്യമന്ത്രി പ്രസംഗിച്ച് തീരുന്നതിന് മുൻപ് തന്നെ അനൗൺസർ അനൗൺസ്മെന്റ് തുടങ്ങുകയായിരുന്നു. സംഭവത്തിന്റെ വിഡിയോയിലും ഇത് വ്യക്തമാണ്. വേദിയിൽ വച്ച് തന്നെ മുഖ്യമന്ത്രി അതൃപ്തി പ്രകടിപ്പിക്കുന്നതും കാണാം.
അതേസമയം മുഖ്യമന്ത്രി സംസാരിച്ച് അവസാനിപ്പിച്ചു എന്ന് കരുതിയാണ് അനൗൺസ്മെന്റ് തുടങ്ങിയതെന്നാണ് അദ്ദേഹം പറയുന്നത്. വേദിയുടെ പുറകിലായിരുന്നു അനൗൺസർ. മറ്റ് ഭാരവാഹികൾ ഇതിൽ ഇടപെട്ടെങ്കിലും ക്ഷുഭിതനായി മുഖ്യമന്ത്രി വേദി വിടുകയായിരുന്നു. ഇതിനെ തുടർന്ന് മുഖ്യമന്ത്രി തുടർ പരിപാടികളിലും പങ്കെടുത്തില്ല.
കെട്ടിടം ഉദ്ഘാടനം ചെയ്തതായി അറിയിക്കുന്നുവെന്ന് പറഞ്ഞതിന് ശേഷം തുടർന്ന് സംസാരിക്കുന്നതിന് മുൻപ് തന്നെ കെട്ടിട നിർമ്മാണത്തിന് മേൽനോട്ടം വഹിച്ച എഞ്ചിനീയർമാരുടെ പേര് പറഞ്ഞുകൊണ്ട് അനൗൺസ്മെന്റ് ഉയർന്നു. അയാൾക്ക് ചെവി കേട്ടുകൂടെന്നാണ് തോന്നുന്നതെന്ന് മൈക്കിലൂടെ മുഖ്യമന്ത്രി പറഞ്ഞു. ശേഷം ഇതൊന്നും ശരിയായ കാര്യമല്ലെന്ന് പറഞ്ഞ് വേദി വിട്ട് പുറത്തേക്ക് പോവുകയായിരുന്നു.
എന്നാൽ ഈ വാർത്ത നിഷേധിച്ച് മുഖ്യമന്ത്രി പിണറായി വിജയൻ തന്നെ രംഗത്ത് എത്തി. വേദിയിൽ നിന്ന് പിണങ്ങിപ്പോവുകയോ ക്ഷുഭിതനാകുകയോ താൻ ചെയ്തിട്ടില്ല. തനിക്കുണ്ടായ ബുദ്ധിമുട്ട് അറിയിക്കുക മാത്രമാണ് ചെയ്തതെന്ന് മുഖ്യമന്ത്രി കാസർഗോഡ് തന്നെ മറ്റൊരു വേദിയിൽ പ്രതികരിച്ചു. പനയാല്‍ സിപിഎം ലോക്കല്‍ കമ്മറ്റി കെട്ടിടത്തിന്റെ ഉദ്ഘാടനവേദിയിലാണ് പിണറായി വിജയന്‍ വിവാദത്തെക്കുറിച്ച് പ്രതികരിച്ചത്.
