ഷാർജയിലെ ഫ്ലാറ്റിൽ കഞ്ചാവ് വളർത്തിയ സംഘത്തെ പോലീസ് അറസ്റ്റ് ചെയ്തു. ഏഷ്യൻ വംശജരായ സംഘത്തെയാണ് ഷാർജ പോലീസ് അറസ്റ്റ് ചെയ്തത്. ഷാർജ പബ്ലിക് പ്രോസിക്യൂഷൻ ഇത് സംബന്ധിച്ച അന്വേഷണം ആരംഭിച്ചിട്ടുണ്ടെന്ന് അധികൃതർ അറിയിച്ചു.
പിടിയിലായ സംഘം താമസിച്ചിരുന്ന ഫ്ലാറ്റിൽ ആണ് കഞ്ചാവ് വളർത്തുന്നതായി പോലീസ് കണ്ടെത്തിയത്. മയക്കുമരുന്ന് കടത്തുക എന്ന ഉദ്ദേശത്തോടെ കഞ്ചാവ് കൃഷി നടത്തി എന്ന കുറ്റം ചുമത്തിയാണ് ഇവർക്കെതിരെ കേസ് എടുത്തിരിക്കുന്നത്. എന്നാൽ നർകോട്ടിക് ചെടികളുടെ സ്വഭാവം പ്രോസിക്യൂഷൻ ഇതുവരെ വെളിപ്പെടുത്തിയിട്ടില്ല.
അതേസമയം കഞ്ചാവ് ചെടികളാണ് ഇതെന്ന് കാണിക്കുന്ന ചിത്രങ്ങൾ ഷാർജ പോലീസ് പുറത്ത് വിട്ടിട്ടുണ്ട്. കുറ്റം തെളിയിക്കപ്പെട്ടാൽ മയക്ക്‌ മരുന്ന് കടത്തുന്നതിന് നൽകുന്ന പരമാവധി ശിക്ഷയായ വധശിക്ഷ ആയിരിക്കും ഇവർക്ക് ലഭിക്കുക എന്ന് ഷാർജ പോലീസ് അറിയിച്ചു.
