പ്രവാസി മലയാളികൾക്ക് ആശ്വാസം നൽകുന്ന പ്രഖ്യാപനവുമായി എയർ ഇന്ത്യ. ഇനി നാട്ടിലേക്കുള്ള യാത്ര കൂടുതൽ അനായാസമാക്കി ദോഹയിൽ നിന്നും കൊച്ചിയിലേക്ക് നേരിട്ടുള്ള വിമാന സർവീസ് ഉടൻ തുടങ്ങുമെന്ന് എയർ ഇന്ത്യ അറിയിച്ചു. ഒക്ടോബർ 23 മുതൽ ആഴ്ചയിൽ ഏഴു ദിവസങ്ങളിലും ദോഹ-കൊച്ചി സെക്ടറിൽ സർവിസ് ഉണ്ടാവും. ഓൺലൈൻ വഴി ബുക്കിങ്ങും ആരംഭിച്ചിട്ടുണ്ട്. നിലവിൽ എയർ ഇന്ത്യ എക്സ്പ്രസും ഇൻഡിഗോയുമാണ് ദോഹ-കൊച്ചി സെക്ടറിൽ നേരിട്ട് സർവീസ് നടത്തുന്ന ഇന്ത്യൻ ബജറ്റ് എയർലൈൻസുകൾ.
ഈ സർവീസുകൾക്ക് പുറമെയാണ് എയർ ഇന്ത്യയും ആഴ്ചയിൽ എല്ലാ ദിവസങ്ങളിലുമായി യാത്ര ഷെഡ്യൂൾ ചെയ്തിരിക്കുന്നത്. പുലർച്ച 1.30ന് കൊച്ചിയിൽ നിന്നും പറന്നുയരുന്ന എയർ ഇന്ത്യ വിമാനം 3.45ന് ദോഹയിലെത്തും. 4.45ന് കൊച്ചിയിലേക്ക് തിരിച്ച് സർവീസ് നടത്തും. ഈ വിമാനം രാവിലെ 11.35ഓടെ കൊച്ചിയിൽ ഇറങ്ങുന്ന രൂപത്തിലാണ് സർവീസ് ഷെഡ്യൂൾ ചെയ്തിരിക്കുന്നത്.
അതേസമയം ജെറ്റ് എയര്‍വേസ് നേരത്തേ സർവിസ് നടത്തിയിരുന്ന സമയത്താണ് എയര്‍ ഇന്ത്യയുടെ പുതിയ സർവിസ്. നിലവില്‍ ഖത്തറില്‍ നിന്നും 440 റിയാല്‍ മുതലാണ് ടിക്കറ്റ് നിരക്ക്‌ ഈടാക്കുന്നത്. മാത്രമല്ല കൊച്ചിയിൽ നിന്നും ദോഹയിലേക്ക് 19,000 നിരക്കിലും ടിക്കറ്റ് ലഭ്യമാണ്. പുതിയ സർവീസ് ആരംഭിക്കുന്നതോടെ 4.45 മണിക്കൂർ കൊണ്ട് യാത്രക്കാർക്ക് ലക്ഷ്യസ്ഥാനത്ത് എത്താൻ കഴിയും. നേരത്തേ, ഡൽഹി, മുംബൈ ഉൾപ്പെടെ കണക്ഷൻ ഫ്ലൈറ്റുകൾ വഴിയായിരുന്നു എയർ ഇന്ത്യ കൊച്ചി സർവിസ് ഓപറേറ്റ് ചെയ്തിരുന്നത്. എയർ ഇന്ത്യ എക്സ്പ്രസ് നിലവിൽ ദിവസേന കൊച്ചി-ദോഹ സർവിസ് നടത്തുന്നുണ്ട്. കൂടാതെ ഒക്ടോബർ അവസാന വാരം മുതൽ ദോഹയിൽ നിന്നും തിരുവനന്തപുരത്തേക്കും നേരിട്ടുള്ള വിമാനം പ്രഖ്യാപിച്ചിട്ടുണ്ട്.
•കൊച്ചി – ദോഹ (1.30am-3.45 am)
•ദോഹ – കൊച്ചി (4.45am – 11.35am)
