പ്രശസ്‌ത നാടക – സിനിമ – സീരിയൽ നടനും സംവിധായകനുമായ വി.പി രാമചന്ദ്രൻ (81) അന്തരിച്ചു. സംഗീത നാടക അക്കാദമി അവാർഡ് ജേതാവ് കൂടിയായ രാമചന്ദ്രൻ റിട്ടയേർഡ് എയർ ഫോഴ്സ് ഉദ്യോഗസ്ഥനും അമേരിക്കൻ കോൺസുലേറ്റ് ജീവനക്കാരനുമായിരുന്നു.
1987 മുതൽ സിനിമയിൽ സജീവമായ രാമചന്ദ്രൻ 19 സിനിമകളിൽ വേഷമിടുകയും നിരവധി ചിത്രങ്ങളിൽ ഡബ്ബിങ് ആർട്ടിസ്റ്റായി പ്രവർത്തിക്കുകയും ചെയ്തിട്ടുണ്ട്. അടുത്ത കാലം വരെ സീരിയലുകളിലും നാടകത്തിലും സജീവമായിരുന്നു. കിളിപ്പാട്ട്, അപ്പു, അയ്യർ ദ് ഗ്രേറ്റ്, പൊലീസ് ഓഫസർ, കഥാനായിക, ഷെവിലിയർ, സദയം, യുവതുർക്കി, ദി റിപ്പോർട്ടർ, ദയ, കണ്ടെത്തൽ, അതിജീവനം, വർണപ്പകിട്ട്, കുങ്കുമച്ചെപ്പ്, ഗംഗ്രോത്രി തുടങ്ങിയ സിനിമകളിലാണ് വേഷമിട്ടിട്ടുള്ളത്.
ലോക പ്രശസ്‌ത നർത്തകൻ പത്മഭൂഷൻ വി.പി.ധനഞ്ജയൻ്റെ സഹോദരനാണ്. സംസ്കാരം നാളെ രാവിലെ 9 മണിക്ക് നടക്കും. ഭാര്യ വത്സ രാമചന്ദ്രൻ (ഓമന). മക്കൾ ദീപ (ദുബൈ). ദിവ്യ രാമചന്ദ്രൻ (നർത്തകി, ചെന്നൈ ). മരുമക്കൾ; മാധവൻ കെ (ബിസിനസ്, ദുബായ് ). ശിവസുന്ദർ (ബിസിനസ്, ചെന്നൈ).
