അന്യഗ്രഹ ജീവികൾ എപ്പോഴും അത്ഭുതവും അതിലേറെ സംവാദവിഷയവുമാകാറുണ്ട്. അന്യഗ്രഹ ജീവികളുണ്ടെന്നും ഇല്ലെന്നുമുള്ള അവകാശ വാദങ്ങൾ തുടർച്ചയായി ഉയരാറുണ്ട്. ഇതിനിടെ അന്യഗ്രഹ ജീവികളുടേത് എന്ന അവകാശവാദവുമായി രണ്ട് മൃതദേഹങ്ങൾ മെക്സിക്കോ കോൺഗ്രസിന് മുമ്പിൽ ഔദ്യോഗികമായി പ്രദർശിപ്പിച്ചിരിക്കുകയാണ് ഇപ്പോൾ. പെറുവിലെ കസ്കോയിൽ നിന്ന് ആയിരം വർഷം മുമ്പ് ലഭിച്ചതാണിവയെന്ന അവകാശവാദവുമായി മൂന്ന് വീതം വിരലുകളുള്ള രണ്ട് ചെറിയ ശരീരങ്ങളാണ് പ്രദർശിപ്പിച്ചിരിക്കുന്നത്. പത്രപ്രവർത്തകനും പറക്കും തളികകളെക്കുറിച്ച് പഠനം നടത്തുന്ന വ്യക്തിയുമായ ജെയ്മി മൗസന്റെ നേതൃത്വത്തിലാണ് പ്രദർശനം നടത്തുന്നത്.
സാൻ ലാസറോ ലെജിസ്ലേറ്റിവ് പാലസിൽ സത്യപ്രതിജ്ഞ ചെയ്ത ശേഷമാണ് മൗസൻ മെക്സിക്കോ കോൺഗ്രസിന് മുമ്പിൽ പ്രദർശിപ്പിച്ച ശരീര അവശിഷ്ടങ്ങൾ ഭൂമിയിലെ പരിണാമ പ്രക്രിയയുടെ ഭാഗമല്ലെന്നും അന്യഗ്രഹ ജീവികളുടേതാണെന്നും വ്യക്തമാക്കിയത്. പക്ഷേ ഇത് പറക്കും തളികകൾ പോലെയുള്ള അന്യഗ്രഹ വാഹനങ്ങൾ തകർന്നുവീണ് ലഭിച്ചവയല്ല. ഇവ കടൽക്കളകളുടെ ഖനികളിൽ നിന്ന് ലഭിച്ചവയും പിന്നീട് ഫോസിലായി സംരക്ഷിച്ചവയുമാണെന്നാണ് മൗസൻ പറയുന്നത്. ഈ സ്പെസിമെൻ ഓട്ടോണമസ് നാഷണൽ യൂണിവേഴ്സിറ്റി ഓഫ് മെക്സിക്കോ (യുനാം) വിശകലനം ചെയ്ത് ഇവയിൽ നിന്ന് ഡിഎൻഎ ശേഖരിച്ചുവെന്നും മൗസൻ അവകാശപ്പെട്ടു. ഈ കൊച്ചു ശരീരങ്ങളിൽ ധാരാളമായി മണൽ പോലെയുള്ള വസ്തു കണാൻ സാധിക്കുന്നത് അസാധാരണ കാര്യമാണെന്നും അദ്ദേഹം ചൂണ്ടിക്കാട്ടി.
2017-ൽ മൗസൻ അന്യഗ്രഹജീവികളുടേതാണെന്ന് പറഞ്ഞ് പെറുവിൽ നിന്നു ലഭിച്ച 5 മമ്മികൾ പ്രദർശിപ്പിച്ചിരുന്നു. എന്നാൽ ഇത് തെറ്റാണെന്ന് ശാസ്ത്രലോകം തെളിയിക്കുകയും ചെയ്തിരുന്നു. പിന്നീടൊരിക്കൽ നീളമുള്ള തലയോട്ടിയുള്ള മമ്മികളെ പെറുവിൽ നിന്നു കിട്ടിയെന്നും മൗസൻ പറഞ്ഞിരുന്നു. ഇതും അന്യഗ്രഹ ജീവികളുടേത് ആണെന്നു പറഞ്ഞാണ് അദ്ദേഹം പ്രദർശിപ്പിച്ചത്. ഇതും തെറ്റാണെന്നു പിന്നീട് ഗവേഷകർ തെളിയിച്ചു. എന്നാൽ ഇത്തവണ സത്യപ്രതിജ്ഞ ചെയ്ത ശേഷമാണ് മൗസൻ അവകാശവാദം ഉന്നയിച്ചിരിക്കുന്നത്.
