‘നേര്’ എന്ന സിനിമയുടെ വലിയ വിജയം ആഘോഷിക്കുന്നതിന്റെ തിരക്കിലാണ് മോഹൻലാൽ ആരാധകർ. ഇനി വരാനുള്ളത് ലിജോ ജോസ് പെല്ലിശ്ശേരി-മോഹൻലാൽ കൂട്ടുകെട്ടിൽ ഒരുങ്ങുന്ന ‘മലൈക്കോട്ടൈ വാലിബനാണ്’. ഇപ്പോഴിതാ ആകാംഷയുണർത്തുന്ന ‘മലൈക്കോട്ടൈ വാലിബൻ’ സിനിമയുടെ പുതിയൊരു പോസ്റ്റർ പുറത്തുവിട്ടിരിക്കുകയാണ് അണിയറ പ്രവർത്തകർ. അടുത്തിടെ പുറത്തുവന്ന ചിത്രത്തിന്റെ ടീസറും ഗാനവുമെല്ലാം വലിയ രീതിയിൽ വൈറലായിരുന്നു.
ഏറെ സസ്‌പെൻസ് നിറയ്ക്കുന്ന ചിത്രമായിരിക്കും ‘മലൈക്കോട്ടൈ വാലിബൻ’ എന്നുറപ്പിക്കുന്ന പോസ്റ്റർ ആണ് ഇപ്പോൾ പുറത്തുവന്നിരിക്കുന്നത്. ജടാധാരികളായ ഒരുകൂട്ടം സന്യാസിമാരുടെ നടുവിൽ മോഹൻലാൽ ഇരിക്കുന്നതായാണ് പുറത്തുവന്നിരിക്കുന്ന പോസ്റ്ററിൽ കാണാൻ സാധിക്കുക. മലൈക്കോട്ടൈ വാലിബന്റെ റിലീസിന് 30 ദിവസങ്ങൾ മാത്രമാണ് ഇനിയുള്ളത് എന്ന് ഓർമിപ്പിച്ചുകൊണ്ട് ആരാധകർക്ക് ക്രിസ്മസ് ആശംസകളും നേർന്നാണ് പോസ്റ്റർ പുറത്തുവിട്ടിരിക്കുന്നത്.
ലിജോ ജോസ് പെല്ലിശേരി സംവിധാനം ചെയ്യുന്ന പിരിയഡ് ഡ്രാമയാണ് ‘മലൈക്കോട്ടൈ വാലിബൻ’. സിനിമയുടെ ഓരോ അപ്ഡേറ്റുകൾക്കും വലിയ ആവേശവും സ്വീകാര്യതയുമാണ് ലഭിച്ചുകൊണ്ടിരിക്കുന്നത്. ജനുവരി 25നാണ് ചിത്രം തിയേറ്ററുകളിലേക്ക് എത്തുക. സോണാലി കുൽക്കർണി, കഥ നന്ദി, ഡാനിഷ് സെയ്‍ത്, മണികണ്ഠൻ ആർ ആചാരി, ഹരിപ്രശാന്ത് വർമ, ഹരീഷ് പേരടി, രാജീവ് പിള്ള, സുചിത്ര നായർ, എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
