സംവിധായകൻ അൽഫോൻസ് പുത്രന് ആശംസകളുമായി കമൽഹാസൻ. കമൽഹാസന്റെ പിറന്നാളിനോട്‌ അനുബന്ധിച്ച് അൽഫോൻസ് പുത്രൻ ഒരു പാട്ട് തയാറാക്കിയിരുന്നു. ആ പാട്ട് കേട്ടതിനു ശേഷം തന്റെ നന്ദി ഒരു വോയ്സ് നോട്ട് ആയി താരം അൽഫോൻസിന് അയയ്ക്കുകയായിരുന്നു. നടൻ പാർഥിപനാണ് അൽഫോൻസിന് ആശംസകളറിയിച്ചുള്ള കമൽഹാസന്റെ ശബ്ദം പുറത്ത് വിട്ടത്. പാർഥിപൻ വഴിയായിരുന്നു അൽഫോൻസ് തന്റെ പാട്ട് കമൽഹാസന്റെ അടുത്ത് എത്തിച്ചത്. ആരോഗ്യ പ്രശ്നങ്ങൾ മൂലം സിനിമാ, തിയറ്റർ കരിയർ അവസാനിപ്പിക്കുകയാണെന്ന് അൽഫോൻസ് പ്രഖ്യാപിച്ചിരുന്നു. ആരോഗ്യത്തിൽ ശ്രദ്ധിക്കാനും അദ്ദേഹം നിർദേശിക്കുന്നുണ്ട്.
‘അൽഫോൻസിന്റെ പാട്ട് കേട്ടു. ആരോഗ്യം കുറച്ച് മോശമാണെന്ന് പറയുകയുണ്ടായി. എന്നാൽ മനസ്സ് നല്ലതുപോലെ ഇരിക്കുന്നുവെന്ന് തോന്നുന്നു. കാരണം, ആ സന്തോഷം പാട്ടുകളിൽ പ്രകടമാണ്. ജീവിതവും അങ്ങനെ സന്തോഷമായി മുന്നോട്ട് പോകട്ടെ. നിങ്ങൾ എടുക്കുന്ന തീരുമാനം നിങ്ങളുടേത് മാത്രമാണ്. എന്നാൽ ആരോഗ്യം നന്നായി കാത്തുസൂക്ഷിക്കണം. എന്റെ എല്ലാവിധ ആശംസകളും – കമൽ പറഞ്ഞു.
കഴിഞ്ഞ മാസമാണ് അൽഫോൻസ് പുത്രൻ സിനിമ, തിയറ്റർ കരിയർ അവസാനിപ്പിക്കുന്നു എന്ന് പ്രഖ്യാപിച്ചത്. തനിക്ക് ഓട്ടിസം സ്‌പ്കെട്രം ഡിസോർഡർ എന്ന രോഗമാണെന്ന് സ്വയം കണ്ടെത്തിയെന്നും ആർക്കും ബാധ്യതയാകാൻ ഉദ്ദേശിക്കുന്നില്ലെന്നും അൽഫോൻസ് സമൂഹമാധ്യമത്തിൽ പങ്കുവച്ച കുറിപ്പിലൂടെ പറയുകയും ചെയ്തിരുന്നു.
