ഉലകനായകൻ കമൽഹാസൻ അഭിനയിച്ച ‘നായകൻ’ എന്ന ചിത്രം 36-വർഷത്തിനുശേഷം വീണ്ടും പ്രദർശനത്തിനെത്തുന്നു. മണിരത്നം സംവിധാനം ചെയ്ത നായകൻ 1987-ലാണ് പുറത്തിറങ്ങിയത്. ഡിജിറ്റൽ സാങ്കേതികവിദ്യയിലൂടെ നവീകരിച്ച സിനിമ നവംബർ മൂന്നിനാണ് റിലീസ് ചെയ്യുന്നത്. ശബ്ദവിന്യാസത്തിലും നിറത്തിലും ഒട്ടേറെ പുതുമകൾ നൽകിയാണ് ചിത്രം വീണ്ടും തിയേറ്ററിലെത്തിക്കുന്നത്.
തമിഴ്നാട്ടിൽ 120 തിയേറ്ററുകളിലും കേരളത്തിൽ 60 തിയേറ്ററുകളിലും ഉൾപ്പെടെ രാജ്യത്തെ 280 കേന്ദ്രങ്ങളിലാണ് ‘നായകൻ’ പ്രദർശിപ്പിക്കുക. മുംബൈ പശ്ചാത്തലമാക്കിയുള്ള സിനിമയിൽ വേലു നായ്ക്കർ എന്ന കഥാപാത്രത്തെയാണ് കമൽ അവതരിപ്പിച്ചത്. ഈ ചിത്രത്തിലൂടെ മികച്ച നടനുള്ള ദേശീയ പുരസ്കാരവും കമൽഹാസൻ നേടിയിരുന്നു.
കമൽഹാസന് പുറമെ മികച്ച ഛായാഗ്രാഹകനുള്ള പുരസ്കാരം പി.സി. ശ്രീറാമിനും കലാസംവിധായകനുള്ള പുരസ്കാരം തോട്ടാധരണിക്കും ചിത്രത്തിലൂടെ ലഭിച്ചിരുന്നു. ശരണ്യ, കാർത്തിക, ജനകരാജ്, ഡൽഹി ഗണേഷ്, നാസർ, നിഴൽകൾ രവി തുടങ്ങിയവരാണ് ചിത്രത്തിൽ വേഷമിട്ടിരിക്കുന്നത്. വർഷങ്ങൾക്ക് മുമ്പ് കണ്ട ചിത്രം പുതിയ രൂപത്തിലും ഭാവത്തിലും വീണ്ടും കാണാനുള്ള കാത്തിരിപ്പിലാണ് ആരാധകർ.
