ഒരുപാട് ആരാധകരുള്ള താരമാണ് നടൻ സൂര്യ. സൂര്യയുടെ കരിയറിലെ ഏറ്റവും വലിയ ചിത്രമായ ‘കങ്കുവ’യുടെ റിലീസിനായി കാത്തിരിക്കുകയാണ് ആരാധകർ. ഇപ്പോഴിതാ, സൂര്യയെ പ്രശംസിച്ച് നടിയും സൂര്യയുടെ ജീവിതപങ്കാളിയുമായ ജ്യോതിക എത്തിയിരിക്കുകയാണ്. കങ്കുവയുടെ ചെറിയൊരു ഭാഗം താൻ കണ്ടുവെന്നും സൂര്യ തന്റെ 200 ശതമാനം അധ്വാനം ഈ സിനിമയ്ക്കായി നൽകിയിട്ടുണ്ടെന്നും ജ്യോതിക പറഞ്ഞു.
‘കങ്കുവയുടെ ഒരു ചെറിയ ഭാഗം മാത്രമേ താൻ കണ്ടിട്ടുള്ളു. പ്രേക്ഷകർക്ക് പുത്തൻ അനുഭവമാകും സിനിമ സമ്മാനിക്കുക എന്ന് അതിൽ നിന്ന് തന്നെ എനിക്ക് മനസിലായി’- ജ്യോതിക കുറിച്ചു. വളരെ നന്നായി ചിത്രം ഒരുക്കിയിട്ടുണ്ടെന്നും താരം അഭിപ്രായപ്പെട്ടു. സിനിമയ്ക്ക് വേണ്ടിയാണെങ്കിലും കുട്ടികൾക്ക് വേണ്ടിയാണെങ്കിലും കുടുംബത്തിന് വേണ്ടിയാണെങ്കിലും എന്നും 200 ശതമാനം നൽകുന്നയാളാണ് സൂര്യയെന്നും ജ്യോതിക കൂട്ടിച്ചേർത്തു.
സൂര്യയുടെ കരിയറിലെ തന്നെ ഏറ്റവും മുടക്കുമുതലുള്ള ചിത്രം കൂടിയാണ് ശിവ സംവിധാനം ചെയ്യുന്ന ‘കങ്കുവ’. പീരിയോഡിക് ത്രീഡി വിഭാഗത്തിലാണ് ചിത്രം എത്തുക. 38 ഭാഷകളിൽ റിലീസ് ചെയ്യുന്ന ചിത്രത്തിൽ ബോളിവുഡ് താരം ദിഷ പഠാണിയാണ് നായിക കഥാപാത്രത്തെ അവതരിപ്പിക്കുന്നത്. ബോബി ഡിയോളാണ് വില്ലൻ വേഷത്തിൽ എത്തുക. സൂര്യയുടെ ഇതുവരെ കാണാത്ത വേഷപ്പകർച്ചയാണ് ചിത്രത്തിൽ കാണാൻ സാധിക്കുക എന്ന കാര്യം ഉറപ്പാണ്. വിവേകയും മദൻ കർക്കിയും ചേർന്നാണ് ഗാനരചന നിർവഹിക്കുന്നത്. സുപ്രീം സുന്ദറാണ് സംഘട്ടനസംവിധാനം. യു.വി. ക്രിയേഷൻസിന്റെ ബാനറിൽ വംശി പ്രമോദും സ്റ്റുഡിയോ ഗ്രീനിന്റെ ബാനറിൽ കെ.ഇ. ജ്ഞാനവേൽ രാജയും ചേർന്നാണ് ചിത്രം നിർമ്മിക്കുന്നത്. ചിത്രം തിയറ്ററുകളിൽ വിസ്മയം തീർക്കുമോ എന്ന് കാത്തിരുന്നു കാണാം.
