ആറന്മുള കോട്ടയിൽ നവജാത ശിശുവിനെ ബക്കറ്റിൽ ഉപേക്ഷിച്ച സംഭവത്തിൽ കുഞ്ഞിൻ്റെ അമ്മയുടെ മൊഴി ഇന്ന് രേഖപ്പെടുത്തും. കുഞ്ഞിനെ ഉപേക്ഷിച്ചതിന് സിഡബ്ല്യുസിയുടെ നിർദേശപ്രകാരം ജുവനൈൽ ജസ്റ്റിസ് ആക്ട് ചുമത്തിയാണ് യുവതിക്കെതിരെ പൊലീസ് കേസെടുത്തിരിക്കുന്നത്. പ്രസവശേഷം അമിത രക്തസ്രാവത്തെ തുടർന്ന് യുവതി ചെങ്ങന്നൂരിലെ സ്വകാര്യ ആശുപത്രിയിൽ ചികിത്സയിലാണ്. യുവതിയുടെ അമ്മയുടെ മൊഴിയും രേഖപ്പെടുത്തും.
ഇന്നലെ ഇരുവരും സംഭവത്തിൽ വ്യക്തതയില്ലാതെയാണ് പൊലീസിനോട് സംസാരിച്ചത്. അതേസമയം കുഞ്ഞ് കോട്ടയം മെഡിക്കൽ കോളേജ് ആശുപത്രിയിൽ കുട്ടികളുടെ വിഭാഗത്തിൽ ചികിത്സയിൽ കഴിയുകയാണ്. മാസം തികയാതെ ജനിച്ച കുഞ്ഞിനെ അതിതീവ്ര പരിചരണ വിഭാഗത്തിലാണ് പ്രവേശിപ്പിച്ചിരിക്കുന്നത്.
അമിത രക്തസ്രാവവുമായാണ് കോട്ടയിൽ സ്വദേശിയായ യുവതി ആദ്യം ആശുപത്രിയിലെത്തുന്നത്. വീട്ടില്‍ പ്രസവിച്ചതായും മരിച്ച കുഞ്ഞിനെ കുളിമുറിയിൽ ഉപേക്ഷിച്ചതായുമാണ് യുവതി ആശുപത്രി അധികൃതരെ അറിയിച്ചത്. തുടര്‍ന്ന് ആശുപത്രി അധികൃതർ പൊലീസിനെ വിവരമറിയിച്ചതോടെ പൊലീസ് ഉടൻ തന്നെ മുളക്കുഴയിലെ വീട്ടിലെത്തി പരിശോധന നടത്തുകയായിരുന്നു. ബക്കറ്റിൽ കിടന്നിരുന്ന കുഞ്ഞ് കൊണ്ടുപോകും വഴി അനങ്ങുന്നത് ശ്രദ്ധയില്‍പെട്ട പൊലീസ്, ഉടൻ തന്നെ തൊട്ടടുത്ത ആശുപത്രിയിലെത്തിക്കുകയായിരുന്നു. ഭര്‍ത്താവുമായി അകന്നുകഴിയുകയാണ് യുവതിയെന്ന് പൊലീസ് പറഞ്ഞു.
സംഭവത്തിൽ ദുരൂഹതയുണ്ടെന്ന് വാർഡ് മെമ്പർ പൊലീസിനോട് പറഞ്ഞു. പെൺകുട്ടി ഗർഭിണി ആണെന്ന വിവരം അറിയില്ലായിരുന്നുവെന്ന് വാർഡ് മെമ്പർ ഉഷ രാജേന്ദ്രൻ പ്രതികരിച്ചത്. സംഭവത്തിൽ ദുരൂഹതകൾ ഉണ്ടെന്നും യുവതിക്ക് എന്തോ ചതി സംഭവിച്ചിട്ടുണ്ടെന്നാണ് സംശയമെന്നും മെമ്പർ പറഞ്ഞു. നവജാത ശിശു മരിച്ചെന്നാണ് യുവതിയും അമ്മയും ആശുപത്രിയിൽ അറിയിച്ചത്. യുവതിയുടെ മൂത്ത കുട്ടിയാണ് ബക്കറ്റിൽ കുഞ്ഞ് കിടക്കുന്ന വിവരം അറിയിച്ചത്. ഇതിൻ്റെ അടിസ്ഥാനത്തിലാണ് പൊലീസ് വീട്ടിൽ എത്തിയതെന്നും പൊലീസ് നടത്തിയ സമയോചിത ഇടപെടലാണ് കുട്ടിയുടെ ജീവൻ രക്ഷിച്ചതെന്നും വാർഡ് മെമ്പർ കൂട്ടിച്ചേർത്തു.
