തെന്നിന്ത്യൻ സൂപ്പർ സൂര്യ ഓസ്‍കര്‍ പുരസ്കാരത്തിനുള്ള ആദ്യ വോട്ട് രേഖപ്പെടുത്തി. ഓസ്‍കറിന് വോട്ട് ചെയ്തതായി താരം തന്നെയാണ് സാമൂഹ്യ മാധ്യമത്തിലൂടെ പങ്കുവച്ചത്. അക്കാദമി ഓഫ് മോഷൻ പിക്ചേഴ്സ് ആർട്‍സ് ആൻഡ് സയൻസസില്‍ അംഗമാകുന്ന ആദ്യ തെന്നിന്ത്യൻ താരമാണ് സൂര്യ.
Voting done! #Oscars95 @TheAcademy pic.twitter.com/Aob1ldYD2p
— Suriya Sivakumar (@Suriya_offl) March 8, 2023
ബോളിവുഡ് നടി കാജോളും കമ്മറ്റി അംഗമാണ്. സംവിധായിക റീമ കഗ്‍ടിയാണ് കമ്മറ്റിയിൽ ക്ഷണിക്കപ്പെട്ട മറ്റൊരു ഇന്ത്യക്കാരി. ഡോക്യുമെൻ്ററി സംവിധായകരായ സുഷ്‍മിത് ഘോഷ്, റിന്റു തോമസ് എന്നിവര്‍ക്കും ക്ഷണമുണ്ട്. ഇരുവരും സംവിധാനം ചെയ്ത ‘റൈറ്റിംഗ് വിത്ത് ഫയര്‍’ എന്ന ഡോക്യുമെന്ററിക്ക് കഴിഞ്ഞ തവണ ഓസ്‍കര്‍ നോമിനേഷൻ ലഭിച്ചപ്പോള്‍ സൂര്യ നായകനായ ‘സൂരരൈ പോട്ര്’ 2021ല്‍ ഇന്ത്യയുടെ ഔദ്യോഗിക ഓസ്‍കര്‍ എൻട്രിയായിരുന്നു.
ഷാരൂഖ് ഖാൻ, ആമിര്‍ ഖാൻ, എ ആര്‍ റഹ്‍മാൻ, അലി ഫസല്‍, അമിതാഭ് ബച്ചൻ, പ്രിയങ്ക ചോപ്ര, ഏക്ത കപൂര്‍ വിദ്യാ ബാലൻ തുടങ്ങിയവരും ഇന്ത്യയിൽ നിന്ന് അക്കാദമിയുടെ ഭാഗമായിട്ടുണ്ട്. ലോസ് ഏഞ്ചൽസിൽ നടക്കുന്ന ഓസ്‌കാർ അവാർഡുകൾക്ക് വോട്ടുചെയ്യാൻ ക്ഷണിക്കപ്പെട്ട അംഗങ്ങൾക്ക് സാധിക്കും.
ഇന്ത്യ ആകാംക്ഷയോടെ കാത്തിരിക്കുകയാണ് ഇത്തവണത്തെ ഓസ്‍കറിനായി. മികച്ച ഒറിജിനല്‍ സോംഗ് വിഭാഗത്തില്‍ അവാര്‍ഡിന് മത്സരിക്കുന്ന ‘ആര്‍ആര്‍ആറി’ലെ ‘നാട്ടു നാട്ടു’വിലാണ് ഇന്ത്യയുടെ പ്രതീക്ഷകൾ. ഷൗനക് സെൻ സംവിധാനം ചെയ്ത ‘ഓള്‍ ദാറ്റ് ബ്രീത്ത്‍സ്’, കാര്‍ത്തികി ഗോണ്‍സാല്‍വസിന്റെ ‘ദ് എലിഫെന്റ് വിസ്പേഴ്സ്’ എന്നീ ഡോക്യുമെന്ററികളും ഇന്ത്യയില്‍ നിന്ന് ഓസ്‍കറിനെത്തിയിട്ടുണ്ട്.
ഓസ്‍കര്‍ പുരസ്‍കാര വേദിയിലെ അവതാരകരില്‍ ഒരാളായി ഇന്ത്യയുടെ ദീപിക പദുക്കോണും സ്ഥാനം നേടിയിട്ടുണ്ട്. ദീപിക പദുക്കോണിന് പുറമേ റിസ് അഹമ്മദ്, എമിലി ബ്ലണ്ട്, ഗ്ലെൻ ക്ലോസ്, ജെന്നിഫര്‍ കോനെല്ലി, അരിയാന ഡിബോസ്, സാമുവല്‍ എല്‍ ജാക്സൺ, ഡ്വയിൻ ജോണ്‍സണ്‍, മൈക്കല്‍ ബി ജോര്‍ഡൻ, ട്രോയ് കോട്‍സൂര്‍, ജോനാഥൻ മേജേഴ്സ്, മെലിസ മക്കാര്‍ത്തി, ജാനെല്‍ മോനെ, സോ സാല്‍ഡാന, ക്വസ്‍റ്റേ്ലാവ്, ഡോണി യെൻ എന്നിവരാണ് മറ്റ് അവതാരകര്‍. 16 പേരാണ് ഇത്തവണ ഓസ്‍കറിന് അവതാരകരായെത്തുക. 2016ല്‍ ഓസ്‍കാര്‍ പ്രഖ്യാപനത്തിന് അവതാരകയായി നടി പ്രിയങ്ക ചോപ്രയുമുണ്ടായിരുന്നു.
