പ്രധാനമന്ത്രി നരേന്ദ്ര മോദിയെ പ്രശംസിച്ച് ബോളിവുഡ് താരം അക്ഷയ് കുമാര്‍. ഇന്ത്യയിലെ ഏറ്റവും വലിയ ഇന്‍ഫ്ളുവന്‍സർ പ്രധാനമന്ത്രി നരേന്ദ്ര മോദിയാണെന്ന് അക്ഷയ് കുമാര്‍ പറഞ്ഞു. അദ്ദേഹത്തിന്‍റെ വാക്കുകള്‍ രാജ്യത്ത് വലിയ മാറ്റങ്ങള്‍ കൊണ്ടുവരുമെന്നും അത് സിനിമ മേഖലയ്ക്ക് ഗുണകരമാണെന്നും അക്ഷയ് കുമാർ അവകാശപ്പെട്ടു.
ജനുവരി 17ന് നടന്ന ബിജെപി ദേശീയ നിർവാഹക സമിതി യോഗത്തിൽ സിനിമകളെ സംബന്ധിച്ച് അനാവശ്യ പരാമര്‍ശങ്ങള്‍ നടത്തുന്നതില്‍ നിന്നും വിട്ടു നില്‍ക്കാന്‍ പ്രധാനമന്ത്രി മോദി ബിജെപി പ്രവര്‍ത്തകരോട് ആവശ്യപ്പെട്ടിരുന്നു. ഇത്തരം പരാമർശനങ്ങൾ ബിജെപിയുടെ വികസന അജണ്ടയെ ബാധിക്കുന്നതായി മോദി പറഞ്ഞുവെന്നായിരുന്നു റിപ്പോര്‍ട്ട്.
പ്രധാനമന്ത്രിയുടെ ഈ നിർദേശം സൂചിപ്പിച്ചാണ് അക്ഷയ് കുമാര്‍ മോദിയെ പുകഴ്ത്തിയിരിക്കുന്നത്. “പ്രധാനമന്ത്രി ഇത്തരത്തില്‍ പറഞ്ഞിട്ടുണ്ടെങ്കില്‍ അത് ശുഭസസൂചനയാണ്, അതിനെ സ്വാഗതം ചെയ്യണം. അദ്ദേഹം ഇന്ത്യയിൽ ഏറ്റവും അധികം സ്വാധീനമുള്ള വ്യക്തിയാണ്. അദ്ദേഹം പറയുന്ന വാക്കുകൾ കൊണ്ട് മാറ്റങ്ങള്‍ സംഭവിച്ചാല്‍ അത് സിനിമ രംഗത്തിന് നല്ലതാണ്” – അക്ഷയ് കുമാര്‍ വ്യക്തമാക്കി.
